‘बुढीगण्डकी बचाउन’ नयाँ शक्तिका युवा धर्नामा

२०७४ साउन १८ बुधवार
Sujan Panta

काठमाडौं ।  सरकारले जलाशययुक्त बुढीगण्डकी जलविद्युत आयोजना निर्माणका लागि चिनियाँ कम्पनी गेजुवासँग गलत तरिकाले सम्झौता गरेको भन्दै नयाँ शक्ति पार्टी निकट युवा संगठन राष्ट्रिय युवा अभियानले विरोध गर्दै बुधबार अपरान्ह काठमाडौंको माइतिघर मण्डलामा प्रदर्शन गरेको छ ।

सरकारले राजनीतिक रुपमा अनैतिक, गैरकानूनी एवं राष्ट्रिय स्वाभिमानविपरित हुनेगरी राष्ट्रिय गौरवको आयोजना निर्माण गर्न गलत नियतका साथ चिनियाँ कम्पनीलाई ठेक्का दिएकोप्रति नयाँ शक्तिको युवा संगठनले धर्ना दिएको हो ।

धर्नामा सहभागी राष्ट्रिय युवा अभियानका संयोजक कमल शाहीले राष्ट्रिय गौरवको आयोजना निर्माणका लागि आन्तरिक रुपमा आफैंले वित्तीय स्रोतको व्यवस्थापन गर्नुपर्ने र राष्ट्रको हित विपरित हुनेगरी विदेशी कम्पनीलाई सुम्पिनु नहुने बताउँदै सरकारसँग सम्झौता खारेजीको माग गर्नुभयो ।

नयाँ शक्तिले बुढीगण्डकी आयोजनाको सम्झौता गैरकानूनी र राष्ट्रिय स्वार्थविपरित भएको, साथै यसले दीर्घकालीन रुपमा आर्थिक तथा सामाजिक समस्या सिर्जना गर्ने भन्दै सम्झौता खारेज गरी आफ्नै स्रोतबाट आयोजना निर्माण गर्न दबाबस्वरुप नयाँ शक्ति पार्टीका संयोजक डा. बाबुराम भट्टराईले प्रधानमन्त्री शेर बहादुर देउवालाई ज्ञापनपत्र बुझाउनुभएको थियो ।

त्यस्तै नयाँ शक्ति पार्टीनिकट विभिन्न आंगिक संगठनहरु तथा अन्य स्वतन्त्र पेशागत संघसंस्था तथा संगठनहरुले निरन्तर यो सम्झौता खारेजी गरी स्वदेशी पूँजी र लगानीमा आयोजना निर्माण गर्न दबाब दिंदै आएका छन् ।