परिवारका सबै चारजना अपाङ्ग, रेखाले उठाइन् यस्तो कदम

२०७४ पुस २९ शनिवार
NewsDesk Shikharnews

काठमाडौं, २९ पुस । गोरखा जिल्लाको गण्डकी गाउँपालिका वडा नं. ३ याङ्डीका दलबहादुर भुजेलका सबै परिवार अपाङ्ग छन् । ९० बर्षीय दलबहादुर भुजेल, उनका छोराहरु ४३ बर्षीय राम भुजेल र ४० वर्षीय छोरा चंखबहादुर भुजेल तथा ३५ वर्षीया छोरी देवीमाया भुजेल पनि अपाङ्ग नै भएपछि सिङ्गो परिवार सहाराविहीन बनेको छ ।

जन्मजातै सहाराविहीन यो परिवारमा आम्दानीको कुनै स्रोत छैन । विनाशकारी भूकम्पले घर भत्किएपछि उनीहरु यतिबेला चुहिने टहरामा जीवन बिताउन बाध्य छन् । सरकारी निकाय र संघसंस्थाबाट सहयोगको आशामा बसेको अपाङ्ग परिवार घिर्सिएर जिउन बाध्य छन् । तर कहिँकतैबाट सहयोग भने उनलाई प्राप्त हुन सकेको छैन ।

जन्मजात नै सबै अपाङ्ग रहेको यस परिवारमा बाबु, दुई छोरा र एक छोरी बस्दै आइरहेका छन् । दुई छाक टार्नको लागि परिवारलाइ हम्मेहम्मे परेको छ । खान लाउन समस्या त छँदैछ, गएको बिनाशकारी भुकम्पले सिर छोप्ने जेनतेन धानेको सानो घरसम्म भत्किने अबस्थामा रहेपछि बस्नको लागि पनि एक्दमै गाह्रो भएकाले कष्टकर जीवन बिताउन बाध्य छन् ।

सरकारी निकायबाट सहयोगको आश्वासन मात्र पाएको यस परिवारलाई सहयोगका लागि गोरखा नगरपालिका– ११ एघार किलो बजारमा श्रेयान क्लिनर केमिकल हाउसकी सञ्चालिका रेखा तामाङ जुटेकी छन् । “तपाई हामी मिलेर यो परिवारलाई केही हदसम्म सहयोग पक्कै गर्न सक्छौँ”, रेखा भन्छिन्, “सहयोगी मन भएकाहरुलाई हातेमालो गर्न आग्रह गरेकी छु । राम्रो सहयोग पनि प्राप्त भइसकेको छ ।” रेखाले अपाङ्ग भुजेल परिवारका लागि हालसम्म विभिन्न व्यक्ति तथा संघसंस्थाबाट ३ लाखको हाराहारीमा सहयोग जुटिसकेको शिखरन्युजलाई बताइन् । अपाङ्गमैत्री घर बनाइदिने लक्ष्य रहेको तामाङ बताउँछिन् । रेखाको यो अभियानमा जोडिएर सहाराविहीन यो भुजेल परिवारलाई टेको लगाउने कि ?