यसरी भयो एमाले र माओवादी केन्द्रबीच पार्टी एकताको टुङ्गो




२०७४ माघ २९ सोमवार
NewsDesk Shikharnews

काठमाडौं, २९ माघ । चिरप्रतिक्षाको विषय बनेको एमाले–माओवादी केन्द्रबीच पार्टी एकताको विषय टुङ्गोमा पुगेको छ । केपी शर्मा ओली र पुष्पकमल दाहाल “प्रचण्ड” दुबै एकीकृत पार्टीको अध्यक्ष हुने, प्रधानमन्त्री आलोपालो चलाउने र नामचाहिँ नेपाल कम्युनिष्ट पार्टी राख्ने सहमति भएसँगै पार्टी एकताको विषय औपचारिक घोषणा हुनमात्रै बाँकी रहेको बताइएको छ ।

दुई पार्टीका नेताहरुको पदीय व्यवस्थापनको विषय टुंगिएसँगै पार्टी एकताको विषयले फड्को मारेको हो । पदीय बाँडफाँडको औपचारकि टुंगो बुधवार बस्ने एकता संयोजन समितिको बैठकले गर्ने बताइएको छ ।

ललितपुर मानभवनस्थित माओवादी निकट व्यवसायी शारदाप्रसाद अधिकारीको घरमा भएको केपी शर्मा ओली र पुष्पकमल दाहालबीचको दुई घण्टा लामो वार्तामा प्रधानमन्त्रीका रुपमा ओलीले सरकारको र अध्यक्षका रुपमा दाहालले पार्टीको नेतृत्व गर्ने सहमति भएको हो । दुई नेताले अध्यक्ष र प्रधानमन्त्री आलोपालो गर्ने सहमति भएको माओवादीनिकट स्रोतले बताएको छ ।

अध्यक्षद्वय ओली र दाहालबीच फेरि एक चरण छलफल हुने बताइएको छ । विशेषतः दुई पार्टीबीच एकताका लागि पदीय भागवण्डा पेचिलो विषय बनेको थियो । यसअघि दुई अध्यक्षबीच पटकपटक भेटघाट र छलफल भए तापनि ठोस निष्कर्ष भने निस्केको थिएन । दुई अध्यक्षबीच छलफल र पार्टी एकता संयोजन समितिको पटकपटक बैठक बसे तापनि विगतका छलफलहरु विशेषतः राष्ट्रियसभा तथा समानुपातिकतर्फका उम्मेदवारहरुको चयन र दुई पार्टीबीचको भागवण्डामा केन्द्रित रहेका थिए ।

निर्वाचनअघि असोज १७ एमाले र माओवादी केन्द्रबीच चुनावी तालमेलको टुङ्गो लागेको थियो । निर्वाचनअघि एमाले र माओवादी केन्द्रबीच पार्टी एकता गर्ने उद्घोषसहित वाम गठबन्धनको घोषणा गरिएको थियो । त्यतिबेला नै पहिलो चरणमा ओली प्रधानमन्त्री र प्रचण्ड अध्यक्ष बन्ने भद्र सहमति भएको बताइएको छ । सोही सहमति कार्यान्वयन गर्न दुबै अध्यक्ष राजी भएका हुन् ।

प्रतिनिधिसभा तथा प्रदेशसभा र राष्ट्रियसभामा समेत चुनावी तालमेल गरेका कारण प्रतिनिधिसभा र राष्ट्रियसभामा वाम गठबधनको बहुमत छ । सातै प्रदेशमा मुख्यमन्त्री समेत दुई दलले भागवन्डा गरिसकेका छन् । जसअनुसार प्रदेश १, ३, ४, ५ एमालेबाट मुख्यमन्त्री बन्दैछन् भने प्रदेश ६ र ७ मा माओवादीले मुख्यमन्त्रीको नेतृत्व गर्दैछ । निर्वाचनमा सोचेकै जस्तो परिणाम प्राप्त गरेपछि भने पदीय बाँडफाँडकै कारण एकता प्रक्रिया उत्साहजनकरुपमा अगाडि बढ्न सकेको थिएन ।