अाज २३ औं जनयुद्ध दिवस, पेरिसडाँडासँगै देशभर मनाइँदै

२०७४ फागुन १ मंगलवार
Newsdesk Shikharnews

काठमाडौं, फागुन १ । तत्कालीन माओवादी जनयुद्ध लडेका विभिन्न पार्टीमा विभाजित माओवादीहरुले विभिन्न कार्यक्रम गरी देशैभरि तथा विदेशमा समेत जनयुद्ध दिवस मनाउँदैछन् ।

दिवसका अवसरमा केन्द्रिय कार्यालय कोटेश्वर पेरिसडाँडामा हुने कार्यक्रममा माओवादी केन्द्रका अध्यक्ष प्रचण्डले सम्बोधन गर्दैछन् । कार्यक्रम बिहान ११ बजे शुरु हुने वाइसीएलले जनाएको छ ।
नेकपा (क्रान्तिकारी माओवादी)ले अन्तरक्रिया, कोणसभा, टोलसभा गरेर जनताको बीचमा जारी तीन महिने संगठन विस्तार अभियानको क्रममा जनयुद्ध दिवस मनाउँदैछ ।

पार्टीको नेवाः राज्यले ललितपुरको कुपण्डोलमा दिउँसो एक अन्तरक्रिया कार्यक्रमको आयोजना गरेको छ ।

२२ वर्षअघि आजकै दिन अर्थात २०५२ फागुन १ गते तत्कालिन नेकपा माओवादीले रोल्पा, सिन्धुली र गोरखाका प्रहरी चौकीमाथि आक्रमण गरि सशस्त्र युद्धको थालनी गरेको थियो ।

माओवादीले जनवादी राज्यसत्ता स्थापना गर्ने घोषणासहित थालेको जनयुद्धका क्रममा करिब १६ हजार नेपालीको ज्यान गएको थियो ।

माओवादीले फागुन १ गतेलाई जनयुद्ध दिवसका रुपमा मनाउँदै आएको छ । २०५२ साल फागुन १ गते आजकै दिन माओवादीले हतियार उठाएर जनताको मुक्तिका लागि भन्दै सशस्त्र युद्ध शुरु गरेको थियो ।

देशभरका सबै तहका कमिटीहरु र विभिन्न दश शहरमा केन्द्रित भएर दिवस मनाउने निर्णय गरेको वाइसीएलका अध्यक्ष रामप्रसाद सापकोटा दीपशीखाले जानकारी दिए ।

‘महान जनयुद्दको २३ औं वार्षिकोत्सव भव्य रुपमा मनाऔं, युवा नेतृत्वको विकाससहित वाम गठबन्धनलाई पार्टी एकतामा बदलौं’ भन्ने नाराका साथ दिवस मनाउने निर्णय गरिएको अध्यक्ष दीपशीखाले बताए ।

१० शहरमा दिवसका लागि आयोजित कार्यक्रमको तयारी गर्न इटहरीमापूर्ण भुजेल, वीरगञ्जमा लालेन्द्रकुमार मण्डल, काठमाडौंमा ज्ञानबहादुर गुरुङ, चितवनमा केहरसिंह कुँवर, पोखरामा विनय थापा, बुटवलमा गंगा कार्की ‘पुजा’, दाङमा गणेश शाही, नेपालगञ्जमा रतन शाही, सुर्खेतमा गगनबहादुर मल्ल ‘युनाईटेड’ र धनगढीमा सुरज सिंहलाई जिम्मा दिइएको छ ।

यस्तै दिवसका अवसरमा पेसिडाँडामा आयोजित कार्यक्रममा माओवादी केन्द्रका अध्यक्ष प्रचण्ड र एमाले उपाध्यक्ष वामदेव गौतमलगायत विभिन्न नेताहरूले सम्बोधन गर्ने बताइएको छ ।