ट्रम्पकी बुहारीलाई शंकास्पद चिठ्ठी, खोल्दा सेतो पाउडर




२०७४ फागुन १ मंगलवार
NewsDesk ShikharNews

एजेन्सी, फागुन १ । अमेरिकी राष्ट्रपति डोनाल्डड ट्रम्पकी बुहारीलाई अस्पताल भर्ना गरिएको छ । राष्ट्रपति ट्रम्पका जेठा छोरा ट्रम्प जुनियरको म्यानहटनमा रहेको घरमा आएको एक खाम खोलेपछि भेनेसा ट्रम्पमा समस्या देखिएको थियो ।

खाममा सेतो पाउडर रहेको र सावधानिका लागि भेनेसालाई अस्पताल भर्ना गरिएको अमेरिकी सञ्चारमाध्यमले जनाएका छन् । अज्ञात व्यक्तिले ट्रम्प जुनियरको घरमा सेतो शंकास्पद पाउडरसहितको खाम पठाएका हुन् ।

परीक्षण गर्दा त्यो पाउडर खतरनाक नदेखिएको न्युयोर्क प्रहरीले जनाएको छ । खाम खोल्ने बित्तिकै भेनेसासहित त्यहाँ रहेका दुईजनालाई अग्नी नियन्त्रण विभागका कर्मचारीले अस्पताल लगेका हुन् ।

भेनेसा शारीरिक रुपमा प्रभावित नरहेको बताइएको छ । भेनेसा ट्रम्पकी आमाले चिठ्ठी पाएको र त्यसलाई भेनेसाले खोलेको सिबिएस न्युयोर्कले जनाएको छ ।

भेनेसा र ट्रम्प जुनियरको सन् २००५ को नोभेम्बरमा विवाह भएको हो । उनीहरुका पाँच सन्तान छन् । घटनापछि अनुसन्धान भइरहेको छ ।