यसरी हुँदैछ प्रदेश नं. ६ मा सरकार गठनको गृहकार्य




२०७४ फागुन १ मंगलवार
Udaya GM

काठमाडौं, १ फागुन । प्रदेश नं ६ मा नयाँ सरकार गठनको आन्तरिक गृहकार्य शुरु भएको छ । मुख्यमन्त्रीका लागि नेकपा (माओवादी केन्द्र)का प्रदेशसभा सांसद महेन्द्रबहादुर शाही संसदीय दलको नेतामा चयन भइसकेको र उनको नेतृत्वमा सरकार गठनको गृहकार्य थालिएको हो ।

आफ्नो नेतृत्वमा सरकार बन्ने निश्चित भएपछि नेता शाहीले सरकार गठनका लागि आन्तरिक गृहकार्य थालेको बताइएको छ । संविधानबमोजिम निर्वाचन आयोगले प्रदेशको निर्वाचन परिणाम घोषणा गरेको ३० दिनभित्र प्रदेश प्रमुखले संसदमा बहुमत प्राप्त ठूलो दललाई प्रदेश सरकार गठनका लागि आह्वान गर्ने व्यवस्था बमोजिम प्रदेश प्रमुख दुर्गाकेशर खनालले फागुन ३ गते सरकार गठनका लागि आह्वान गर्नुपर्ने हुन्छ ।

त्यसअघि नै प्रदेश प्रमुख दुर्गाकेशर खनाललाई माओवादीका सांसद महेन्द्रबहादुर शाहीको नेतृत्वमा सरकार गठनका लागि नेकपा (एमाले) र माओवादी केन्द्रका सांसदको हस्ताक्षर बुझाउने तयारी भएको सांसद सीता नेपालीले जानकारी दिएकी छन् । प्रदेश नं ६ मा जम्मा ४० जना प्रदेशसभा सदस्यमध्ये एमालेका २० र माओवादी केन्द्रकाबाट १३ जना सदस्य छन् । एकजनामात्रै सांसद रहेको राप्रपाले राष्ट्रियसभाको चुनावमा वाम गठबन्धनका उम्मेदवारलाई मतदान गरेको थियो ।

एमाले–माओवादी केन्द्र गठबन्धनको सहमतिअनुसार यस प्रदेशमा माओवादी केन्द्रले सरकारको नेतृत्व गर्ने टुङ्गो लागिसकेको छ । जम्मा सांसद संख्याको २० प्रतिशत नबढ्ने गरी मन्त्रिमण्डल गठन गर्नुपर्ने सबैधानिक व्यवस्था अनुसार यो प्रदेशमा ८ सदस्यीय मन्त्रिमण्डल हुनेछ । प्रदेश नं ६ मा वाम गठबन्धनका दलहरु एमाले र माओवादी केन्द्रले सानो आकारको ७ सदस्यीय मन्त्रिमण्डल बनाउने तयारी गरेका छन् ।

Loading…