चितवन पुगेर प्रचण्डले किन भने ढिलोचाँडो प्रधानमन्त्री भएरै छाड्छु ?




२०७४ फागुन १ मंगलवार
NewsDesk Shikharnews

राजेन्द्र आचार्य

भरतपुर, १ फागुन । नेकपा माओवादी केन्द्रका अध्यक्ष पुष्पकमल दाहाल “प्रचण्ड”ले ढिलो चाँडो आफू प्रधानमन्त्री बनेरै छाड्ने बताएका छन् । शरदपुर माबिको ४३ औ बार्षिकोत्सव एवं अभिभावक दिवस समारोहमा बोल्दै प्रचण्डले नेपाली कांग्रेसले आफूलाई बारम्बार प्रधानामन्त्री बन्न प्रस्ताब गरेको खुलाउँदै त्यस्तो धारणा राखेका हुन् ।

अध्यक्ष प्रचण्डले हिजो सोमबारमात्रै एमाले अध्यक्ष केपी ओलीसँग वान टु वान वार्ता गरेका थिए । ओलीसँग सहअध्यक्षको मोडालिटीमा पार्टी एकता गर्ने सहमति नजिक पुगेको समाचार सार्वजनिक हुनेवित्तिकै कांग्रेसको प्रस्ताव र ढिलोचाँडो प्रधानमन्त्री बन्ने प्रसङ्गले वाम एकताको भविस्य र जनताद्वारा अनुमोदित एजेण्डाप्रति प्रश्न उब्जाएको छ ।

केही दिनअघि मात्रै चितवनमा प्रचण्डले देशको हितका निम्ति जस्तो पनि निर्णय लिन सक्छु भन्दै अभिव्यक्ति दिएका थिए । यसलाई सर्वत्र चासो र अर्थपूर्ण रुपमा व्याख्या गरिएको थियो । प्रचण्डले देशको समृद्धिको लागि संबिधान निर्माण गर्ने ३ पार्टी एक हुनुको विकल्प नभएको समेत बताए ।

उनले चितवनको विकासको लागि आफू प्रयासरत रहेको भन्दै नयाँ सरकार बन्दा साथ भरतपुर महानगरपालिकामा निर्माण हुने भनिएको रिङ्ग रोडको लागि २ अर्ब बजेट विनियोजित गर्ने प्रतिबद्दता समेत जनाएका थिए ।