अध्यक्षद्वय ओली र दाहालबीच एक्लाएक्लै वार्ता




२०७४ फागुन १ मंगलवार
NewsDesk Shikharnews

काठमाडौं, १ फागुन । नेपाल कम्युनिष्ट पार्टी (एमाले)का अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल “प्रचण्ड”बीच आज एक्लाएक्लै वार्ता भएको छ । दुई अध्यक्षबीचको एक्लाएक्लै वार्ताले बुधवार पार्टी एकता संयोजन समितिको बैठक बस्ने निर्णय गरेको छ ।

ललितपुरको मानभवनस्थित निर्माण व्यवसायी शारदाप्रसाद अधिकारीको घरमा भएको दुई नेताबीचको वार्ताले बुधबार दिउँसो पार्टी एकता संयोजन समितिको बैठक बस्ने निर्णय गरेको हो । एमाले अध्यक्ष ओलीका प्रेस संयोजक चेतन अधिकारीले दुई नेताबीच मंगलबार भएको वार्ताको विषय भने जानकारी गराइएको छैन ।

पार्टी एकतालाई अन्तिम रुप दिन पार्टी एकता संयोजन समितिको बैठक राखिएको माओवादी केन्द्रका एक नेताले जानकारी दिएका छन् । नेताहरुका अनुसार बुधबारको बैठकले वैचारिक र सांगठनिक कार्यदल निर्माण गर्नेछ ।

पार्टी एकता संयोजन समितिमा एमालेबाट ओलीसहित वरिष्ठ नेता माधव नेपाल, उपाध्यक्ष वामदेव गौतम र महासचिव ईश्वर पोख्रेल छन् । उता माओवादी केन्द्रका तर्फबाट प्रचण्डसहित उपाध्यक्ष नारायणकाजी श्रेष्ठ र नेता रामबबहादुर थापा बादल रहेका छन् ।