प्रधानमन्त्री देउवा आजै राजिनामा दिने तयारीमा

२०७४ फागुन २ बुधवार
Newsdesk Shikharnews

काठमाडौं, २ फागुन -प्रधानमन्त्री शेरबहादुर देउवाले आज बुधबार पदबाट राजीनामा दिने मनस्थिति बनाएको बुझिएको छ । आजै निर्वाचन आयोगले प्रतिनिधिसभाको मतपरिणाम सहितको सांसदको नामावली राष्ट्रपतिलाई बुझाउने तयारी गरेको छ ।

आयोगले बुधबार प्रतिनिधिसभामा निर्वाचित सांसदको सूची राष्ट्रपतिलाई बुझाएपछि नयाँ सरकार बनाउने प्रक्रिया स्वतः अघि बढ्नेछ ।

आयोगले निर्वाचनको परिणाम बुझाउने तयारी गरेको बेला देउवाले राजीनामा दिने तयारीमा रहेको एक मन्त्रीले जानकारी दिए । देउवा करिब साढे आठ महिना अघिदेखि प्रधानमन्त्री छन् ।
उनका अनुसार प्रधानमन्त्री देउवा राष्ट्रको नाममा सम्बोधन गर्दै राजीनामा दिने सोचमा छन् । राष्ट्रपतिले नयाँ सरकारको प्रक्रिया अघि बढाउनुअघि सम्बोधन गर्ने विषयमा मंगलबार राति बालुवाटारमा छलफल गरेको देउवा निकट स्रोतले बताएको छ ।

‘सबैको सुझाव अनुसार राजिनामा दिन उपयुक्त हुन्छ भन्ने आयो,’ स्रोतले भन्यो, ‘बुधबार नै प्रधानमन्त्रीले आफ्नो कार्यकालमा भएका उपलब्धिबारे सम्बोधन गर्दै राजीनामा दिने मनस्थिति बनाउनुभएको छ ।’

कांग्रेस र माओवादी केन्द्रबीच आलोपालो सरकारको नेतृत्वपछि देउवा चौथो पटक मुलुकको ४० औं प्रधानमन्त्रीमा गत जेठ २३ गते निर्वाचित भएका थिए ।