वाइसीएलको बैठक सम्पन्न, के गर्यो निर्णय ?

२०७४ फागुन ३० बुधवार
NewsDesk Shikharnews

काठमाडौं । नेकपा माओवादी केन्द्रको सहायक संगठन योङ्ग कम्युनिष्ट लिग (वाइसीएल) नेपालको केन्द्रीय समितिको बैठक सम्पन्न भएको छ ।

संगठनको कार्यालय पेरिसडाँडामा भएको बैठकले युवासंघ नेपालसँगको सांगठानिक एकताबारे आबश्यक निर्णय गर्ने अधिकार संगठनको केन्द्रीय कार्यालयलाई दिएको छ । बैठकमा नेकपा एमाले र नेकपा माओवादी केन्द्रबीच पार्टी एकता हुने भएपछि दुबै पार्टीका युवा संगठनहरुबीच एकताको आधार तयार गर्न आन्तरिक छलफल हुने वाइसीएल, नेपालका अध्यक्ष दीपशिखाले जानकारी दिए । एमाले र माओवादी केन्द्रले बैशाख पहिलो साता पार्टी एकता गर्ने बताएका छन् ।

बैठकमा प्रदेश, जिल्ला र तल्ला तहसम्मको संगठनको अवस्था, समस्या, सम्भावना र चुनौतिका विषयमा प्रत्येक प्रदेशबाट प्रदेश प्रमुखहरुले आआफ्नो प्रदेशको रिपोटिङ गरेका थिए । उक्त बैठकमा माओवादी केन्द्रका अध्यक्ष प्रचण्ड, नेता नारायणकाजी श्रेष्ठ, नेता मणि थापा लगायतको उपस्थिति रहेको थियो । बैठकले आगामी कार्ययोजना पनि तय गरेको वाइसिएलका प्रचार बिभाग प्रमुख पुष्प ओलीले जानकारी दिए । उनका अनुसार आजको बैठकले केन्द्रीय समितिको कार्यविभाजन तथा पदपूर्ति समेत गर्नेछ ।

आजको बैठकले आन्तरिक धारणा निर्माण गरेपछि युवासंघ नेपालसँगको एकताबारे छलफल थालिने वाइसिएल केन्द्रीय कार्यालयले जनाएको छ ।