प्रधानमन्त्री ओलीलाई फकाउँदै भारत, नेपाललाई दिने सहयोग ६ सय ५० करोड




२०७४ चैत ८ बिहीवार
Newsdesk Shikharnews

काठमाडौं, ८ चैत, प्रधानमन्त्री केपी शर्मा ओलीको नेतृत्वमा सरकार बनेपछि भारत नेपालसँग सम्बन्ध सुधारमा जुटेको छ । प्रधानमन्त्री ओलीसँग सम्बन्ध बढाउने कोशिसमा रहेको भारत सरकारले नेपाललाई दिंदै आएको बार्षिक सहायतामा ७३ प्रतिशत बढाएको छ । योसँगै भारतले दिंदै आएको बार्षिक सहायता नेपाली रुपैयाँ ६ सय ५० करोड पुर्याएको हो ।

ओली प्रधानमन्त्री हुने निश्चित भएपछि भारतीय विदेशमन्त्री सुष्मा स्वराजलाई अग्रिम बधाईका लागि भारतीय प्रधानमन्त्री नरेन्द्र मोदीले नेपाल पठाएका थिए । प्रधानमन्त्री ओलीसँग गरेको प्रतिवद्धताअनुसार भारतले नेपालसँग मित्रताको हात दह्रो बनाउँदैछ ।

नेपालमा चीनको उपस्थिति र प्रभाव बढ्न थालेको भन्दै भारतले वार्षिक सहायतामा थप गर्ने निर्णय गरेको बुधवार भारतबाट प्रकाशित टाइम्स अफ इण्डियामा उल्लेख गरिएको छ । समाचार अनुसार सन् २०१८–२०१९ का लागि भारतले नेपालका लागि यो सहायता रकम छुट्टयाएको हो । सन् २०१७–२०१८ आर्थिक बर्षका लागि ३ सय ७५ करोड छुट्टयाएको थियो ।

भारतबाट सबैभन्दा बढी बार्षिक सहायता पाउनेमा छिमेकी राष्ट्र भुटान अघि छ । भारतले नेपाललाई सहायता छनोटको दोश्रो सूचीमा राखेको छ । भुटानले यसबर्ष भारतबाट १८ सय १३ करोड सहायता पाएको छ ।

चुनावपछि एमाले अध्यक्ष ओली नेतृत्वको सरकार गठनपछि भारतीय प्रधानमन्त्री नरेन्द्र मोदीले सबैभन्दा पहिले वधाइ दिएका थिए । प्रधानमन्त्रीको ओलीको जन्मदिनमा भारतीय दुतावासका राजदूत मन्जितसिंह पुरी निवासमै केक लिएर पुगेका थिए ।