युनाइटेड स्प्रिट्सले सवा तीन करोड पूँजीगत लाभकर तिर्यो, लाभकरपछि मात्रै स्वामित्व परिवर्तन




२०७४ चैत १४ बुधवार

काठमाडौं। नेपाल लिकर्सलाई आफ्नो शेयर बेच्नुअघि युनाइटेड स्प्रिट्सले ठूला करदाता कार्यालयमा तीन करोड २० लाख रुपैयाँ पूँजीगत लाभकर तिरेको छ।

डेढ वर्ष अघिबाट सुरु भएको खरिद बिक्री प्रक्रिया टुंग्याउन कम्पनीले पुँजीगत लाभकर तिरेको हो। पूँजीगत लाभकर बुझाएसँगै स्वामित्व परिवर्तनका लागि अख्तियारी दिइएको ठूला करदाता कार्यालयले जनाएको छ। व्यवसायिक कम्पनीको स्वामित्व परिवर्तनका क्रममा नाफा देखिएमा २५ प्रतिशत पूँजीगत लाभकर तिर्नुपर्ने व्यवस्था छ। त्यसैअनुसार यो रकम बुझाइएको हो।

कम्पनीको स्वामित्व परिवर्तन हुँदा सुरुमा १५ प्रतिशत र दोस्रो किस्तामा १० प्रतिशत पुँजीगत लाभकर तिर्नुपर्ने व्यवस्था थियो। तर एनसेल खरिद बिक्रीमा लागेको कर असुली प्रक्रियामा विवादपछि सरकारले आर्थिक ऐन संशोधन गरी एकैपटक २५ प्रतिशत लाभकर तिर्नुपर्ने व्यवस्था गरेको थियो।

डेढ वर्षअघि युनाइटेड स्प्रिट्सको ८२.४६ प्रतिशत शेयर नेपाली साझेदार राजेशवीर सिंह तुलाधारले किनेका थिए। भारतीय मदिरा कम्पनी युनाइटेड स्प्रिट्स लिमिटेडले आफ्नो साझेदारीमा स्थापना भएको यो कम्पनी ३४ करोड १४ लाख २४ हजार रुपैयाँमा नेपाली साझेदार तुलाधारले किनेका हुन्। यो कम्पनीको नेपाली साझेदारको रुपमा तुलाधारसँग ११.५४ प्रतिशत शेयर थियो।

‘कम्पनी खरिद बिक्रीमा तिर्नुपर्ने पूँजीगत लाभकर फागुन पहिलो साता बुझाइएको छ,’ ठुला करदाता कार्यालय स्रोतले भन्यो, ‘कम्पनीले विस्तृत कारोबार विवरण बुझाउन अझै दुई महिना समय बाँकी छ। त्यसपछि थप विवरण आउन सक्छ।’

आठ करोड २० लाख रुपैयाँ चुक्ता पूँजी भएको युनाइटेड स्प्रिट्स नेपालले गत आर्थिक वर्षमा ६४ करोड ८० लाख भारु(एक अर्व तीन करोड नेपाली रुपैयाँ)को कारोबार गरेको थियो। यो कम्पनीको नेटवर्थ साढे सात करोड रुपैयाँ छ।स्वामित्व परिवर्तसँगै कम्पनीले एन्टिक्विटी, सिग्नेचर, प्लाटिनम नम्बर वान ह्विस्की, गोल्डेन ग्रेप ब्रान्डी, ब्लु रिबान्ड जिनलगायतका विभिन्न १७ ब्रान्डका मदिरा उत्पादन सुरु गरेको छ।