अब सडकमा देखिने छैनन ट्राफिक प्रहरीका हिरो सीताराम हाछेथु

२०७५ मंसिर १२ बुधवार
Newsdesk Shikharnews

ट्राफिक जामको सम्बन्धमा एउटा भनाइ निकै नै प्रचलित छ : जहाँ जाम त्यहाँ सीताराम । हुन पनि काठमाडौं उपत्यकामा जहाँ जाम हुन्थ्यो, त्यहाँ सीताराम हाछेथुको अभाव खड्किन्थ्यो ।

सीताराम हाछेथुले ट्राफिक जाम नियन्त्रणमा महत्वपूर्ण भूमिका निभाएका छन् । उनै सीताराम हाछेथुले गत मंसिर ६ गते देखि प्रहरी निरीक्षक पदबाट अवकाश पाएका छन् । उनलाई अब ट्राफिक प्रहरीको पोशाकमा सडकमा देख्न पाइने छैन ।

यद्यपि अन्य कुनै न कुनै रुपमा भने उनलाई सडकमा देख्न सकिने सम्भावना छ । आगामी दिनका लागि अहिले नै कुनै खास योजना नबनाएको भए तापनि अब पनि यही क्षेत्रमै काम गर्ने हाछेथुले बताए ।

२०४६ पुस १० गते प्रहरी सहायक निरीक्षक (असई) पदबाट उनले ट्राफिक जीवन शुरू गरेका थिए । आफ्नो जीवनको ऊर्जाशील वर्षहरू ट्राफिक प्रहरी भएर सडकमै बिताएका उनले प्रहरी निरीक्षक हुँदा समेत निरन्तर आफ्नो ड्युटी गरिरहे ।

अवकाशपछिको जीवनबारे उनको कुनै लामो सोचाइ छैन । बरु अब सामान्य मानिसको हैसियतमा ट्राफिक जनचेतना फैलाउने काममा लाग्ने सोचेका छन् । ‘मेरो जीवन ट्राफिक क्षेत्रमै बित्यो,’ आफ्नो योजनाबारे उनी भन्छन्, ‘यसकारण अब यो क्षेत्र छाडेर अरू काम गर्न हुँदैन । बरु नयाँ तरीकाले आम मानिसको हित हुने काम गर्नुपर्छ ।’ यसबाहेक उनी आफूले सेवा अवधिमा हासिल गरेको ज्ञान र भोगेको अनुभव विद्यार्थी एवम् यात्रुलाई बाँड्न चाहन्छन् ।

 

                                                  बिज्ञापन

 

सानो प्रयासबाटै परिवर्तनको शुरुआत हुने विश्वास राख्ने हाछेथु फेरि पनि कुनै न कुनै रूपमा सडक र सवारीसँगै जोडिने योजनामा छन् ।

सेवामा रहँदा १ सय २९ वटा मानसम्मान एवम् पदक पाएका हाछेथुले यसै वर्ष राष्ट्रपतिको हातबाट ‘प्रबल जनसेवा श्री’ पदक पाएका छन् । यो बाहेक उनलाई ट्राफिक प्रहरीको आफ्नै कार्यालयले समेत विभिन्न सम्मान प्रदान गरेको छ ।

रोचक पक्ष त के हो भने हाछेथुलाई आम मानिसले सादा पोशाकमा यो भन्दा पहिले कहिल्यै देख्न पाएनन् । तर अब भने उनलाई सादा पोशाकमा पनि देख्न सकिने भएको छ ।

नेपाल सरकारको उपसचिवको रुपमा कार्यरत श्रीमती र इन्जिनियर छोरा तथा छोरी मात्र होइन, समग्र प्रहरी संगठनको सबै दर्जाबाट समेत राम्रो सहयोग पाएकैले आफूले ट्राफिक प्रहरीमा निष्कलंक रुपमा कार्य गर्न सकेको हाछेथु बताउछन्