संकटाद्धारा च्यासल युथ क्लब २-१ गोल अन्तरले पराजित

२०७५ मंसिर १५ शनिवार
Newsdesk Shikharnews

काठमाडौं, मंसिर १५ । पल्सर सहिद स्मारक ए डिभिजन लिग फुटबलमा सिएमजी संकटा क्लबले जित निकालेको छ ।

शनिबार भएको खेलमा संकटाले च्यासल युथ क्लबलाई २-१ गोल अन्तरले पराजित गरेको हो । हल्चोकस्थित एपीएफ मैदानमा संकटालाई जित दिलाउन अमित तामाङ र एलोन म्याक्सवेलले एक एक गोल गरे । च्यासलका सन्तोष साहुखलले एक गोल फर्काए ।

स्टार खेलाडी बिमल घर्ति मगर, सन्तोष साहुखल रहेको च्यासलविरुद्ध संकटाले खेलको २३ औं मिनेटमा पेनाल्टीबाट अग्रता बनाएको थियो । च्यासलका छिरिङ गुरुङले डिबक्स भित्र हाण्ड गरेपछि पाएको पेनाल्टीमा संकटाका अमित तामाङले गोल गरे ।

खेलको ४८ औं मिनेटमा म्याक्सवेलले गोल गर्दै संकटाको अग्रता २-० को बनाए । त्यसपछि खेलको ८७ औं मिनेटमा संकटाले एक गोल फर्काएपनि टोलीको हार टार्न सकेनन् । संकटाका कप्तान सरोज दाहालले सन्तोष साहुखललाई फल गरेपछी पाएको पेनाल्टीमा सन्तोषले गोल गर्दै च्यासललाई २-१ मा ल्याएका थिए । तर, च्यासलले थप गोल फर्काउन सकेन र खेल संकटालाई सुम्पियो ।

खेलमा संकटाका नितिन थापा म्यान अफ दि म्याच चुनिए । जितसंगै संकटा तेस्रो स्थानमा उक्लिएको छ । संकटाले पाँच खेलबाट ९ अंक जोडेको छ । पराजित च्यासल ४ अंक जोडेर आठौं स्थानमा छ । च्यासलको यसै मैदानमा लगातार दोस्रो हार समेत हो ।