भूकम्प पीडितको पिरलोः घर बनाउन पाएको पैसा दशैं खर्चमै सक्किने भो !

२०७३ असोज १६ आइतवार
Shikhar News
Spread the love

१६ असोज, रामेछाप । मन्थलीस्थित कुमार दर्नालको सुनचाँदी पसलमा दिउँसो एक जोडी प्रौढ भित्रिए । गहना किन्न आएका होलान् भनेर दर्नालले स्वागत गरे । तर, उनीहरुले पोल्टाबाट पैसाको मुठा निकालेर दिँदै भने, ‘लौ न बाबु, हाम्रो यो पैसा जोगाइदिनु पर्‍यो !’

चालीस हजार रुपैयाँको बिटो राखिदिन उनीहरुले दर्नाललाई अनुनय गरे । दर्नाल अन्योलमा परे । मन्थली नगरपालिका सालुका ती दम्पतीले बिन्ती गरे, ‘भूकम्पले भत्काएको घर बनाउन आज ५० हजार रुपैयाँ झिकेको । गाउँका मान्छेसँग बसेर खानपिन गर्दागर्दैर् १० हजार रुपैयाँ त सक्किइहाल्यो । अब नजोगाउने हो भने यो पैसा पनि सकिने भो । यो ४० हजार रुपैयाँ बाबुले राखिदिनुपर्‍यो !’

दर्नाल पैसा राख्न अस्वीकार गरिरहेका थिए भने उनीहरु पैसा राखिदिन बिन्तीभाउ गरिरहेका थिए । त्यही बीचमा सो सुन पसल रहेको घरका घरबेटी एवं आईएमईका सञ्चालक सुरेश उदास आइपुगे । उनीहरुलाई चिनेपछि उदासले ४० हजार रुपैयाँ राख्न दिएको कागज बनाएर पैसा राखी उनीहरुलाई घर पठाइदिए ।

सरकारले दिएको पैसा आउजाउमै ठिक्क

भूकम्प पीडितहरुलाई घर बनाउन सरकारले पहिलो किस्ताको रकम ५० हजार रुपैयाँ बैंक मार्फत दिने निर्णय गरेपछि सदरमुकाममा बैंकहरुमा दैनिक घुइँचो लाग्न थालेको छ । दिनभरि भोकभोकै लाइन लागेर पैसा झिकेपछि त्यो पैसा रामरमाइलोमा खर्च गर्नेको संख्या बढेको छ ।
from-onlinekhabar