काठमाडौं : कांग्रेसका महामन्त्री डा. शंशाक कोइरालाले हिन्दु राज्यका बारेमा जनमतसंग्रह गर्नुपर्ने बताएका छन् ।
शनिबार नेपाल प्रेस युनियन चितवन शाखाले आयोजना गरेको पत्रकार सम्मेलनमा बोल्दै महामन्त्री डा. कोइरालाले हिन्दु राष्ट्रका विषयमा जनमत संग्रहबाट जानु नै उपयुक्त बाटो भएको बताएका हुन् । उनको भनाइ छ‘धर्म भनेको निरपेक्ष, सापेक्ष वा शुन्य हुँदैन, यो त स्वतन्त्र हुन्छ, यसकारण जनमत संग्रहबाट जानु नै उपयुक्त हुनेछ ।’
उनले हिन्दुराष्ट्रका सम्बन्धमा आफुलाई विवाद हुने कुरा नबोल्न पार्टीका नेताहरुले दबाव दिएको समेत खुलासा गरे । तर, उनले आफु हिन्दुहरु नै धेरै भएको कपिलवस्तुको क्षेत्रबाट अत्याधिक मतले चुनाव जितेको समेत बताए ।
कोइरालाले संविधान कार्यान्वयन नै अहिले प्रमुख विषय भएको बताउँदै धर्मको विषय चुनावपछि टुङ्गो लाग्ने समेत स्पष्ट पारे। तीनवटा चुनाव भएमात्रै संविधान कार्यान्वयनका लागि सम्भव हुने भन्दै संविधान संशोधन गर्न कांग्रेस प्रतिवद्ध रहेको कोइरालाले बताए ।