नेपाली महिला क्रिकेट टोलीको लक्ष्य श्रीलंका र बंगलादेश

२०७३ कात्तिक ३ बुधवार
NewsDesk ShikharNews
Spread the love

आईसीसी महिला विश्वकप छनोट शृंखलाको एसिया क्षेत्रमा नेपालले निकै ठूलो चुनौतीको सामना गर्नुपर्‍यो । नेपाली महिला क्रिकेट टोलीका प्रशिक्षक राजु बस्न्यातलाई विश्वास गर्ने हो भने अब नेपालको चुनौती थाइल्यान्ड, हङकङ र चीनसँग होइन ।

यद्यपि छनोट शृंखलाको एसिया क्षेत्रमा नेपाल दोस्रो भयो । पहिलो दुई खेल हारेको नेपालले त्यसपछि ४ मध्येको तीन खेल जितेर उपाधि दौडमा पुगेको थियो । निर्णायक मानिएको जस्तो खेलमा विजयको नजिक पुगेर पनि थाइल्यान्डसँग १ विकेटको पराजय भोग्नु नेपालको उपाधिहीन यात्राको कारण बन्यो । राउन्ड रोबिनको पहिलो चरणको खेलमा पनि थाइल्यान्डसँग विजयको नजिक पुगेर नेपाल चुकेको थियो ।

नेपाली महिला टोलीले सन् २००७ मा मलेसियामा भएको एसीसी वुमन्स प्रतियोगिताबाट अन्तर्राष्ट्रिय यात्रा सुरु गरेको थियो । पहिलो अन्तर्राष्ट्रिय प्रतियोगितामै फाइनल पुगेको नेपाल त्यसयता पहिलोपटक उपविजेता भएको हो । हङकङको सफलताले नेपाललाई अर्को महिना थाइल्यान्डमा हुने एसिया कपसम्म जोडेको छ । नेपालले चार वर्षपछि एसिया कपमा खेल्ने अवसर पाएको हो ।

‘सुरुमा खेलाडीहरूको अलिकति सकारात्मक सोच राखेर खेलेको भए हामीले प्रतियोगिता जित्थ्यौं । मैले बाराम्बार भन्ने गरेको थिएँ हाम्रो टिम प्राविधिक र शारीरिक रूपमा राम्रो छ । मानसिक हिसाबमा चाहिं हामी अलिकति चुक्यौं । सुरुमा खेलाडीहरूमा हामी कमजोर छौं भन्ने मानसिकता भएको मैले पाएँ । एउटा म्याच जितेपछि हामीले लय समात्न लाग्यौं र विपक्षीहरूलाई दबाब दिन लाग्यौं,’ प्रशिक्षक बस्न्यातले भने ।

पहिलो दुई खेलमा आयोजक हङकङ र थाइल्यान्डसँग पराजित भएको नेपालले त्यसपछि चीन र हङकङलाई पराजित गरेको थियो । थाइल्यान्डसँग दोस्रोपटक भिड्दा नेपालले १ सय ८ रनको राम्रो स्कोर बनाए पनि त्यसलाई रक्षा गर्न सकेन । अन्तत नेपालसँगको विजयपछि थाइल्यान्ड विजेता बनेर विश्वकप छनोटमा स्थान बनाउन सफल भयो ।

‘हामी एसिया कपमा खेल्दै छौं, त्यो पनि मलाई त्यस्तो ठूलो नै चुनौती हो जस्तो लाग्दैन । नेपालको प्रतिस्पर्धा चीन, थाइल्यान्ड, हङकङसँग होइन,’ बस्न्यातले भने, ‘नेपालको प्रतिस्पर्धा अब एसिया कपमा बंगलादेश र श्रीलंकालाई पराजित गर्न तयारी गर्नु हो । राम्रोसँग तयारी गर्ने हो भने अब हामी त्यो पनि सक्छौं । महिला क्रिकेटमा बंगलादेश र श्रीलंकाको क्रिकेट स्तर त्यति माथि छैन, जुन स्तर भारत र पाकिस्तानको छ । त्यही भएर हामी श्रीलंका र बंगलादेशलाई पराजित गर्न पनि सक्छौं, तयारी त्यहीअनुरूप हुने हो भने ।’

उनले त्यसका लागि नेपालले समयमै तयारी सुरु गर्नुपर्ने र विदेशमा खेलाडीहरूलाई प्रशिक्षण गराउनु आवश्यक भएको आंैल्याए । प्रतियोगितामा नेपालले खेलेका टिमहरूबारेमा उनले भने, ‘अरू तीन टिममा थाइल्यान्डले निरन्तर खेलिरहेको छ, योभन्दा अगाडि पनि विश्वकप छनोट खेलेको टिम हो । चीनले दिनका दिन राम्रो गर्दै गइरहेको छ । हङकङको टिम पनि राम्रो छ । प्रतियोगिताभरिको प्रदर्शन हेर्दा मेरो विश्लेषण चार टिममा नेपाल नै सबैभन्दा राम्रो टिम थियो ।’

ओपनिङ ब्याटिङको असफलताले पनि टिमको सम्पूर्ण प्रदर्शनमा असर परेको उनी स्विकार्छन् । ‘ओपनिङ ब्याटिङमा हामीलाई निकै समस्या भयो । जुनै पनि खेलमा हामी त्यसबाट पीडित हुनुपर्‍यो, नियमित ओपनरहरूले राम्रो खेल्न सकेनन्,’ यसमा पनि बस्न्यातले समस्या एउटै देखे, ‘ब्याटिङ लाइन अपभन्दा यसमा पनि मानसिक पक्ष नै आउँछ । २ म्याचमा हाम्रा ४(४ खेलाडी रनआउट भएका छन् । मानसिक रूपमा बलियो नभएर त्यो स्थिति आएको हो । त्यसरी रनआउट नभएको भए हामीले ती खेलमा अझ राम्रो स्कोर बनाउन सक्थ्यौं ।’

प्रशिक्षक बस्न्यातले एसिया कपका लागि टिममा केही परिवर्तन अवश्य हुने जनाए । उनले भने, ‘अझ पनि केही राम्रा खेलाडी नेपालमा बाँकी छन् ।’

‘आफ्नो स्तर थाहा पायौं’
केही खेलाडीले व्यक्तिगत रूपमा उत्कृष्ट प्रदर्शन गरे । हङकङकी मारिको हिलसँगै नेरी थापाले प्रतियोगितामा सर्वाधिक १ सय ११ रन बनाइन् । पहिलोपटक राष्ट्रिय टोलीमा समेटिएको निर्मला शाहीले ९३ रन बनाइन् र नेपालको ब्याटिङमा आशा देखाइन् । उनले अलराउन्ड प्रदर्शन गर्ने क्रममा ८ विकेट लिइन् ।

अर्को प्रभावशाली प्रदर्शन गर्नेमा अफब्रेक बलर करुणा भण्डारी थिइन् । उनले नेपालबाट सर्वाधिक ९ विकेट लिइन् । हङकङविरुद्धको खेलमा उनी प्लेयर अफ द म्याचमा चुनिएकी थिइन् । त्यसपछिको खेलमा थाइल्यान्डविरुद्ध ४ विकेट लिने क्रममा उनले एकै ओभरमा ३ विकेट लिएकी थिइन् ।

‘सबै हेर्दा प्रतियोगिता राम्रो भयो । म आफ्नो प्रदर्शनमा सन्तुष्ट छु । अहिले हामी सबै खेलाडीको आत्मविश्वास बढेको छ । हाम्रो स्तर कहाँ छ भनेर सबैले बुझिसके । अब नेपालको महिला क्रिकेट राम्रो हुन्छ भन्ने आशा गरेका छौं,’ करुणाले भनिन्, ‘सुरुको दुई म्याचमा हामी मानसिक रूपमा पराजित जस्तै थियौं । हामीले खुलेर खेल्न सकेनौं । दोस्रो खेल पनि जितिसकेको जस्तै भएको थियो । हाम्रो हातमा आएको खेल हार्‍यौं । हाम्रो ब्याटिङ अलिकति चलिरहेको थिएन, बिस्तारै बिस्तारै जित्नैपर्ने दबाब आइसकेको थियो । यो जितेन भने केही हुँदैन जस्तो हिसाबमा सन्देशहरू आएका थिए ।’

महिला क्रिकेटमा करुणाका नाममा ह्याट्रिक विकेट छ । उनी थाइल्यान्डसँगको खेलमा फेरि नजिक पुगेकी थिइन् । ‘एक ओभरमा ३ विकेट लिँदा म निकै उत्साहित थिएँ । मैले त्यो तीन विकेट आफ्नो पहिलो ओभरमै लिएको थिएँ । अर्को ओभरमा पनि विकेट लिएको भए जितिन्थ्यो जस्तो लागेको थियो,’ उनले भनिन्, ‘स्पिनरहरूलाई सुरुमै गराउँदा अन्तिम नहुँदा हारेका हौं कि जस्तो पनि लाग्छ, दुई जितिसकेको खेल । हाम्रो शक्ति भनेकै बलिङ थियो, बलिङ सबै हेर्दा राम्रो भयो ।