विद्युत् चुहावट भई एक्कासी आगलागी हुँदा लाखौँको क्षति…

२०७३ पुस २८ बिहीवार
NewsDesk ShikharNews

भद्रपुर–५ स्थित बसपार्क छेउमा सञ्चालित मेची कपास उद्योगमा आज आगलागी हुँदा रु १५ लाख बढीको क्षति भएको छ ।

रामचन्द्र सहनीले सञ्चालन गर्दै आइरहेको उद्योगमा यन्त्रबाट विद्युत् चुहावट भई आगलागी भएको प्रहरीले जनाएको छ । आगलागीबाट रु पाँच लाख मूल्य पर्ने यन्त्र, कपास, जुट, जस्तालगायत सामग्री नष्ट भएको भद्रपुर वडा प्रहरी कार्यालयका प्रहरी निरीक्षक कुलप्रसाद चौधरीले जानकारी दिनुभयो ।

भद्रपुर नगरपालिकाको वारुणयन्त्र, प्रहरी र स्थानीयवासीको सहयोगमा आगो नियन्त्रणमा लिइएको थियो ।

यस अघि पनि २०७३ साल असार १५ गतेका दिन तनहुँको भिमाद गाविसस्थित सुन्दर सुवेदीको कपास उद्योगमा विद्युत् चुहावट भई आगलागी हुँदा लाखौँको क्षति भएको थियो ।

 

 

समिप गौतम
शिखरन्युज सम्बादाता