ललितपुर ।

देश प्रमुख व्यक्तिहरु राजधानीका सडकमा चल्ने भन्ने थाहा पाउने वित्तिकै त्यो रुट कम्तिमा पनि २०—३० मिनेट अगाडी देखी नै सवारी जाम हुन्छ । राष्ट्रपति, प्रधानमन्त्री, मन्त्री लगायत जसको सवारीमा पनि यो नियम लागु हुने गर्दछ । तिनै मध्येका गृहमन्त्री गृहमन्त्रीको गाडी भन्ने वितिक्कै अगाडी पछाडी प्रहरीको गाडी, साईरन बजाउँदै घण्टौँसम्म सडक जाम हुने कुरा हामीले प्राय सोच्ने कुरा हो ।

तर बुधबार ठिक त्यसको विपरितको दृश्य देख्नमा आयो । सातदोबाटो चोकमा तीव्र गतिमा हुइकिनुको साटो एकाएक गृहमन्त्री जर्नादन शर्माको गाडी रोकिन्छ । गाडी रोकेर मन्त्री शर्मा ओर्लन्छन् र त्यहाँ ट्राफिक व्यवस्थापन गरिरहेका प्रहरी अधिकृत ललितपुर ट्राफिक प्रहरीका प्रमुख सीताराम हाछेथुलाई गृहमन्त्रीले बोलाउँछन् ।

ट्राफिक व्यवस्थापनमा जनस्तरबाटनै निकै वाहवाही बटुलेका हाछेथुलाई सडकमा नै भेटेर गृहमन्त्री शर्माले राम्रो कामको बधाई दिँदै प्रशंसा गरेका छन् ।

गृहमन्त्रीसँगको अकास्मात भेटबारे प्रश्न गर्दा हाछेथु भन्छन्, ‘गृहमन्त्रीज्यूले बाटोमा नै गाडी रोकेर मसँग हात मिलाउनुभयो । त्यसपछि राम्रो कार्यसम्पादन गरेकोमा बधाई दिनुभयो ।’