काठमाडौं, ४ फागुन । सिन्धुलीको बीपी राजमार्ग अन्तरगत कमलामाई नगरपालिका वडा नं. २ भद्रकालीस्थित सेल्फीडाँडामा शुक्रबार साँझ जीप दुर्घटना भएको छ । उक्त दुर्घटनामा ४ जनाको घटनास्थलमै मृत्यु भएको छ । १८ जना घाइते भएका छन् ।
सदरमुकाम सिन्धुलीमाढीबाट सिन्धुलीकै गोलन्जोर गाउँपालिका ५ नाकाजोलीतर्फ जाँदै गरेको बा ११ च २२७१ नम्बरको जीप दुर्घटनाग्रस्त हुँदा सिन्धुलीकै गोलनजोर गाउँपालिका ५ विजयछापका लक्ष्मीप्रसाद देवकोटा, सोही वडाको चिसापानीका युवराज लुङ्गेली, प्रकाश थापा र रोशन कार्कीको मृत्यु भएको हो । देवकोटा पूर्वगाविस सचिव हुन् । उनी एक महिना अघिमात्र जागिरबाट सेवानिवृत्त भएका थिए ।
चारै जनाको घटनास्थलमै मृत्यु भएको जिल्ला प्रहरी कार्यालय सिन्धुलीका प्रहरी नायब उपरीक्षक विनोद शर्माले बताए । घाइतेमध्ये ५ जनाको अवस्था गम्भीर रहेको बताइएको छ । ‘गम्भीर घाइते भएकाहरुको सिन्धुली अस्पतालमा उपचार हुन नसकेपछि काठमाडौं रिफर गरिएको छ भने अन्य २ जनालाई पनि थप उपचारका लागि काठमाडौं पठाउने तयारी भइरहेको छ, । अन्य ११ जनाको सिन्धुली अस्पतालमा उपचार भइरहेको छ ।
जीपको गति तीब्र रहेको र क्षमताभन्दा बढी यात्रु राखेको उक्त जीप सडकको मोडबाट करिब ७ सय मिटर तल खसेको बताइएको छ । नेपाली सेना, नेपाल प्रहरी, सशस्त्र प्रहरी तथा स्थानीयले घाइतेको उद्धार गरेका छन् ।
Leave a Reply