प्रचण्डले किन देखेनन् यी खाली खुट्टा हिड्दै गरेकी बूढीआमालाई…

२०७५ जेठ २२ मंगलवार
Newsdesk Shikharnews

काठमाडौं, जेठ २२- नेताहरु  पार्टीको काममा,  गाउँघरमा मेला, महोत्सव उद्घाटनका लागि   हिडिरहन्छन् । उनीहरु त्यहाँ पुग्दा बाटोमा देखिने दृश्य ख्याल गर्छन्, गर्दैनन् थाहा छैन ।

आइतबार अर्थात जेठ २० गते नेपाल कम्युनिष्ट पार्टीका अध्यक्ष पुष्पकमल दाहाल प्रचण्ड अन्नपूर्ण सेन्चुरी पर्यटन महोत्सव समापनको बेला घान्द्रुक पुगेका थिए । उनको साथमा प्रदेश नम्बर ४ का सांसद राजिव पहारी पनि सँगै थिए ।

नेकपा अध्यक्ष प्रचण्ड र अर्का नेता पहारी घान्द्रुक जाने बेलामा उनीहरुलाई सम्मान गरिएको छ । उनीहरुको गलामा खादा, माला देख्न सकिन्छ । बाटोमा एउटा गेटमा बूढी आमा खाली खुट्टा कुम्लो बोकेर नेताहरुको आडैबाट बाटो काट्दै गरेको मन छुने तस्बिर छ । तर, उनीहरुले ती आमालाई देखेनन् । आखिर उनी पनि देशकी आमा हुन् ।

प्रचण्ड, पहारी र अन्य नेताहरु, सुरक्षाकर्मी कसैले पनि ती बूढीआमालाई देखेनन् वा नदेखे जस्तो गरेको तस्विरमा देखिन्छ ।

नेताहरुले गरिबका लागि, जनताका लागि काम गरेको बताइरहन्छन् । तर, यस्ता हेर्दा देख्दा सानातिना लाग्ने दृश्यलाई वास्तै नगरी हिडिरहेका हुन्छन् । ती खाली खुट्टा हिड्दै गरेकी आमाको मनले भनेको हुनुपर्छ, ‘मेरो भोट मात्रै काम लाग्छ ।’ सामान्य लागेपनि यस्ता मनै छुने दृश्यलाई नेताहरुले ख्याल गर्न आवश्यक छ । चुनावका बेला सबैलाई नमस्कार गर्दै हिड्ने नेताहरु चुनाव पछि अन्देखा गर्नु राम्रो हुँदैन । 

त्यो तस्बिर भेटेपछि समिता केसीले आफ्नो फेसबुक वालमा राखिन । उनले लेखिन्, सर्वहारा वर्गको प्रतिनिधित्व गर्छु भनेर जनयुद्ध गर्नुभएका अध्यक्ष कमरेड प्रचण्ड र प्रदेश ४ का सांसद कमरेड राजीव पहारी सुटबुटमा टिपटप भएर हिँडिरहँदा छेउबाट एउटी बूढीआमा खाली खुट्टा, च्यात्तिएको फरिया र चोलीमा कुम्लो बोकेर लठ्ठीको सहारामा हिँडिरहँदा यिनका गलाका माला र खादाले ती विपन्न आमालाई देखेनछन् ।’

उनले प्रश्न गरेकी छिन्, भोट माग्दै गर्दा यस्ता आमा र बाहरूलाई दस औंला जोडेर निहुरिने मेरा कमरेडहरु चुनाव जितेपछि यी आमाहरूलाई वेवास्ता गरेर हिँडेको देख्दा नरमाइलो लाग्यो । जे देखियो दुख लाग्यो ।‘

यो तस्बिर कसले खिच्यो थाहा छैन । समिताले फेसबुकमा राखेको फोटो निकै शेयर गरिएको छ । एउटी आमालाई नदेख्नेले देशको समस्या कसरी समाधान गर्लान् भन्ने खालका कमेन्ट गरिएका छन् ।