उपकुलपतिका विषयमा थुप्रै उजुरी परेका छन्, छानबिन हुन्छ : प्रधानमन्त्री ओली




२०७५ असार २६ मंगलवार
Newsdesk Shikharnews

काठमाडौं । प्रधानमन्त्री केपी शर्मा ओलीले संस्कृत विश्वविद्यालयका उपकुलपति कुलप्रसाद कोइरालाले सरकारबाट स्विकृति नलिइ विदेश जान लागेकोले उनलाई रोकिएको स्पष्ट पारेका छन् । संस्कृत विश्वविद्यालयका उपकुलपतिबारे थुप्रै उजुरी परेको बताए । उनका विषयमा परेको उजुरीको निश्पक्ष छानविन हुने प्रधानमन्त्री ओलीको भनाई छ ।

“अहिलेका हल्लाले यो छानविन रोकिदैन” प्रधानमन्त्रीले स्पष्ट पार्दै निर्वाचन आचार संहिता लागू भएपछिका राजनीतिक नियुक्ति मात्रै खारेज गरिएको प्रधानमन्त्रीले स्पष्ट पारे । संस्थाहरुलाई राजनीतिक प्रदुषणबाट मुक्त गर्नका लागि यसो गरिएको प्रधानमन्त्रीले बताए ।

त्यसैगरी प्रधानमन्त्री केपी ओलीले जुम्लामा भोकै सुत्न लगाएर काठमाडौंका सडकमा केही मान्छे कराइ गरेको बताएका छन् । काठमाडौंमा १० बर्ष मेडिकल कलेज खोल्न नपाउने, एउटा विश्व विद्यालयले पाँचवटा भन्दा बढी कलेजलाई सम्बन्धन नदिने जस्ता कुरा व्यवहारिक नभएको प्रधानमन्त्री ओलीको भनाइ छ ।

“कुन बिषयमा कति कलेज आवश्यक छ त्यसको अध्ययन गरौं अनि आवश्यकता अनुसार कलेजलाई सम्बन्धन दिऔं” प्रधानमन्त्री ओलीले भने । संसदमा पेश भएको चिकित्सा शिक्षा विधयक सरकारको नीति अनुसारै भएको र सरकारले आफ्ना नीति अनुसारका ऐन ल्याउनुमा अनौठो नभएको बताए ।

नेपाली विद्यार्थीलाई स्वदेशमा पढ्न नदिने, विदेश पठाउनु पर्ने, हजारौं विगाहा जमिन खरिद गरेर, भवन बनाएर चलाएका अस्पतालहरुलाई कलेज बनाउन रोक्न नमिल्ने प्रधानमन्त्री ओलीको भनाइ छ ।