कर्जन्हा नगरपालिकाको कार्यालयमा आगलागी, मेयरले आगजनी गराएको भन्दै चक्काजाम




२०७५ असार २७ बुधवार
NewsDesk Shikharnews

अस्बिन खड्का

उदयपुर, २७ असार । कर्जन्हा नगरपालिका वडा नं. ११ स्थित बगहामा रहेको नगरपालिकाको कार्यालयमा अज्ञात समूहले गरेको आगजनीले कार्यालयको झ्याल, ढोका र फर्निचर, केही कागजात लगायतका सामानहरुमा क्षति भएको छ । सो नगरपालिकाका मेयर गंगा पासवानले नगरपालिकाको केन्द्र भाड्ने नियतले आगजनी गराएको भन्दै स्थानीयले चक्काजाम गरेका छन् ।

नगरपालिकाको साबिक केन्द्र बगहा रहेपनि मेयर पासवानले कर्जन्हा बजारमा राख्ने पक्षमा रहेकोले स्थानीयहरुले बगहा केन्द्र राख्नुपर्ने भन्दै अदालतमा मुद्दा दिएका थिए । अदालतले कर्जन्हा नगरपालिकाको केन्द्र बगहा राख्नुपर्ने आदेश समेत दिएको स्थानीयले बताए । मेयर गंगा पासवानले आफ्नो स्वार्थका लागि नगरपालिकामा आगजनी गराएको भन्दै स्थानीयहरुले पूर्वपश्चिम लोकमार्गको बस्तीपुर मिर्चैया सडकखण्डको बगहामा चक्काजाम समेत गरेका छन् ।

कार्यालयमा आगजनी गर्ने समूहलाई पक्राउ गरी कारवाही गनुपर्ने माग गर्दै आज करीब बिहान १० बजेदेखि ११ बजेसम्म चक्काजाम गरिएको स्थानीय हरि यादवले जनाएका छन् । मेयर पासवानलाई बोलाई छलफल गर्ने सहमतिपश्चात चक्काजाम खोलिएको इलाका प्रहरी कार्यालय मिर्चैयाका प्रहरी निरीक्षक कैलाश चौधरीले बताए । कर्जन्हा नगरपालिकामा पहिलादेखि नै केन्द्रको विषयमा विवाद हुँदै आएको छ । आगजनीले नगरपालिकाको कामकाज ठप्प भएको छ ।