दिनभर कुरेपछि बेलुकी वैठक स्थगित, कांग्रेसमा गुटको राजनीति




२०७५ भदौ २९ शुक्रवार
Newsdesk Shikharnews

काठमाडौं – नेपाली कांग्रेसभित्र गुट उपगुटको राजनीतिका कारण बैठक स्थगित हुने चलन कुनै नौलो होइन । बिहिबार बस्ने भनिएको वैठक गुट विवादका कारण बस्दै नबसी स्थगित भएको छ । गुटगुटका नेताका कुरा नमिल्दा वैठकका लागि दिनभर कुरेर बस्ने केन्द्रीय पदाधिकारी अलमल परेका छन् ।

कांग्रेस सभापति शेरबहादुर देउवा र नेता रामचन्द्र पौडेल पक्षबीच केन्द्रीय अनुशासन समिति संयोजकको विषयमा विवाद भएपछि केन्द्रीय समितिको बैठक नबसी स्थगित भएको हो ।
दुवै पक्षले समिति संयोजक दाबी छोडेनन् । दुवैले संयोजकको दाबी गरेपछि अनुशासन र कार्यसम्पादन समिति गठनका लागि सानेपामा दिउसो २ बजे बोलाइएको बैठक साँझ साढे छ बजे स्थगित भएको थियो ।

दुवै पक्षले आफ्नो अडान नछाडी बैठक स्थगित गर्नुपरेको थियो । ‘भोकप्यास नभनी बैठक होला भन्दै केन्द्रीय कार्यसमितिका सदस्यले छ घन्टा गुजारेको बताए । तर बैठक सुरु नै नभई स्थगित भयो ।

सहमतिका लागि सभापति देउवा, नेता पौडेल, उपसभापति विमलेन्द्र निधि, महामन्त्रीद्वय शशांक कोइराला, पूर्णबहादुर खड्का, कृष्णप्रसाद सिटौला, अर्जुननरसिंह केसीबीच पटकपटक छलफल भएको थियो।

दुवै पक्षले संयोजकको दाबी नछोडेपछि सहमति हुन सकेन । सभापति देउवा र निकटले अनुशासन र कार्यसम्पादन समिति तत्काल गठन गर्ने र अन्य सहमति र विभाग बनाउँदै जाने प्रस्ताव गरेका थिए। केहीदिन अघि पार्टी सभापति देउवा निवासमा बसको पदाधिकारी बैठकमै भएको सहमति उल्लंघन गरेर पौडेल पक्षले नयाँनयाँ सर्तअघि सारेको आरोप लगाएको छ ।