महानिरीक्षक खनालले यसरी दिए काम नगर्ने अधिकृतलाई बर्खास्त गर्ने चेतावनी




२०७५ असोज २४ बुधवार
NewsDesk Shikharnews

काठमाडौं, २४ असोज । निर्मला पन्तको बलात्कारपछि भएको हत्यामा संलग्नलाई पक्राउ गर्न नसकेको भन्दै चौतर्फी आलोचना भइरहेको बेला प्रहरी महानिरीक्षक सर्वेन्द्र खनालले गलत काम गर्ने जोकोही प्रहरी अधिकृतलाई पनि बर्खास्त गर्ने चेतावनी दिएका छन् ।

प्रहरी महानिरीक्षक खनालले समाज र संगठनभित्र गलत काम गर्ने प्रहरी अधिकृतका कारण आफूलाई “गम्भिर चोट” पुर्याएको उल्लेख गर्दै त्यस्ता प्रहरीलाई कडा कार्वाही गर्ने चेतावनी दिएका हुन् । बुधबार ललितपुरस्थित सातदोबाटोमा निर्मित ट्राफिक प्रहरी परिसरको भवन उद्घाटन गर्दै उनले सरकारले दिएको जिम्मेवारी र नागरिकको जिउधनको सुरक्षा गर्ने दायित्व इमान्दार र निष्ठापूर्वक बहन गर्न पनि मातहतका निकायलाई निर्देशन दिए ।

प्रहरी महानिरीक्षक खनालले सिंगो प्रहरी संगठनमाथि नै लाञ्छना लगाउने काम प्रहरी कर्मचारीबाटै हुने गरेको उल्लेख गर्दै त्यस्ता गतिविधि कडाईका साथ नियन्त्रण गर्ने दृढता पनि व्यक्त गरे । प्रहरी महानिरीक्षक खनालले अपराध नियन्त्रणका लागि प्रहरीलाई सहयोग गर्न पनि नागरिक समाजका अगुवाहरुलाई अपिल गरे ।