रत्नपार्कमा दुलालको ‘काग सम्मेलन’




२०७५ कात्तिक १९ सोमवार
Newsdesk Shikharnews

काठमाडौं । आजदेखि तिहार शुरु भएको छ । तिहारको पहिलो दिन प्रत्येक वर्ष जस्तै कार्तिक कृष्ण त्रयोदशीको पहिलो काग तिहारको दिन आज काग सम्मेलन भएको छ ।

धेरै चरा र जनावरको आवाज निकाल्ने रमेश दुलाल ‘कागे’ ले कागको स्वर निकालेर कागलाई एकै ठाउँमा भेला पारी रत्नपार्कमा करीब ३ सय काग बोलाएर १५ औँ काग सम्मेलन गरेका छन् ।

राष्ट्रिय संगीतकर्मी संघले आयोजना गरेको काग सम्मेलनमा १ सय ७३ जीव जनावर तथा चराचुरुगीको आवाज निकाल्ने इलामका दुलालले विगत १४ वर्षदेखि काग तिहारको दिन काग सम्मेलन गर्दै आएका छन् ।

संविधान नबन्दा काग बोलाएर नयाँ बानेश्वरस्थित संसद् भवन र अन्तर्राष्ट्रिय विमानस्थल घेराउसमेत गरेका थिए । उनले भारतले नेपालमा नाकाबन्दी गर्दा भारतीय राजदूतावास ढोका अगाडि काग बोलाएर विरोध समेत गरेको आजको काग सम्मेलनमा सम्झिए ।

दुलालले मुखबाटै मादल, सनाइ, सारङ्गी, पियानो, ड्रम सेट, मुर्चुङ्गा, गितारको धुनसमेत निकाल्छन् । गाई, भैँसी र अन्य चराचुरुङ्गीको आवाज पनि दुरुस्तै सुनाउने गरेका छन् ।