आज तिहारको दोस्रो दिन कुकुरको पूजा




२०७५ कात्तिक २० मंगलवार
Newsdesk Shikharnews

काठमाडौं । आज नेपालीहरुको दोस्रो ठूलो तिहार पर्वको दोस्रो दिन कुकुर तिहार । यमपञ्चकको दोस्रो दिन भएकाले आज्ञापालक, भरपर्दो रक्षक मानिने कुकरलाई पूजा गरिंदैछ ।

कुकुरलाई यमराजको ढोकापालेको रूपमा पनि मान्ने पौराणिक विश्वास छ । पौराणिक मान्यता अनुसार श्याम र सवल नाम भएका दुईवटा कुकुरले यमलोक जाँदा ढोका खोलिदिन्छन् ।

घरमा कुकुर नपाल्नेहरु पनि कुकुरलाई खोजीखोजी पूजा गर्ने चलन छ । कुकुरलाई माला लगाइदिएर, मीठामीठा खानेकुरा दिएर पूजा गर्ने गरिन्छ ।

वैवस्यत मन्वन्तर कुलमा जन्मिएका कुकुरले युधिष्ठिरलाई स्वर्ग यात्रा गराएको कथन पुराणमा उल्लेख छ । आजभोलि भने मानिसले विभिन्न जातिप्रजातिका कुकुर पाल्ने गर्छन् । सोख अनुसार कुकुरका प्रजाति छानेर पाल्ने गरेको पाइन्छ ।

अन्य जनावरभन्दा कुकुरको सुँघ्न सक्ने क्षमता निकै बढी हुनाले कुकुरलाई घरपालेको रुपमा पाल्ने गरिन्छ । घरमा पालिँदा सधैंभरि चनाखो भएर पालेको रुपमा भूमिका निभाइरहेको हुन्छ ।
शत्रु र मालिकको सहजै पहिचान गर्ने क्षमता कुकुरमा रहेको मानिन्छ ।

हिन्दु धर्ममा कुकुरलाई भैरवका रुपमा पुजा गर्ने चलन छ । कुकुरलाई जघन्य अपराधी पक्राउ गर्नमा पनि सघाउ पुराउने गरेका छन् । नेपाल प्रहरीले पालेका कुकुरलाई कला प्रदर्शन गर्ने गरी र अपराधी पत्ता लगाउने काममा लगाउँदै आएका छन् । सुरक्षा निकायले कुकुरको क्षमताअनुसार पदीय दर्जा समेत दिएर कुकुर पूजागरी श्रद्धासुमनका साथ मनाउने गर्छन् ।