नेकपाको एकतासम्बन्धी कार्यदलमा सहमति जुटेन

२०७५ माघ २८ सोमवार
Newsdesk Shikharnews

काठमाडौं । नेपाल कम्युनिष्ट पार्टी (नेकपा) को तल्लो कमिटीको एकतासम्बन्धी अझैपनि कार्यदलमा सहमति जुट्न नसक्दा प्रतिवेदन दिन सकेको छैन । गत सोमबारको बसेको नेकपा सचिवालयको बैठकले कार्यदललाई एक दिनभित्र एकताको विषयमा भैरहेको प्रगतिबारे विवरणसहित प्रतिवेदन दिन निर्देशन दिएको थियो ।

निर्देशन दिएको एक साता बितिसक्दा पनि प्रतिवेदन आउन नसकेको हो । शुरुमा एकमहिना भित्र प्रतिवेदन बुझाउने जिम्मा पाएको कार्यदलले डेढ महिना बितिसक्दा पनि सहमति जुटाउन सकेको छैन ।

अध्यक्षद्धय केपी शर्मा ओली र पुष्पकमल दाहालबीच शनिबार भएको भेटवार्तामा विवादित विषयलाई चाँडो सहमति गरेर देशव्यापी पार्टी एकताको सन्देश दिने समझदारी भएको थियो । कार्यदलले भने अझै प्रतिवदन पेश गरेको छैन ।

कार्यदलले केही दिन समय थप गर्न नेतृत्वलाई आग्रह गरेको थियो । कहिलेसम्म टुंगाउन सकिन्छ भन्नेमा कार्यदलका सदस्य नै अन्यौलमा देखिन्छन् ।

पार्टीको स्थायी कमिटीको गत पुस १२ को बैठकले सचिवालय सदस्य एवं गृहमन्त्री रामबहादुर थापा, महासचिव पौडेल, स्थायी समिति सदस्य वर्षमान पुन, योगेश भट्टराई, सुरेन्द्र पाण्डे, वेदुराम भुसाल, लेखराज भट्ट, रघुवीर महासेठ, शंर पोखरेल रहेको कार्यदललाई पुस मसान्तभित्र एकता टुंगो लगाउने जिम्मेवारी दिइएको थियो ।