इतिहास शिरोमणिको १३२ औं जन्मजयन्ती

२०७५ फागुन ३० बिहीवार
Newsdesk Shikharnews

काठमाडौं । वरिष्ठ साहित्यकार एवम् इतिहासविद्ले इतिहासशिरोमणि बाबुराम आचार्यका कृति संरक्षण र प्रवद्र्धन गर्न सबैको पहल आवश्यक रहेकोमा जोड दिएका छन् ।

इतिहासशिरोमणि आचार्यको १३२ औँ जन्मजयन्तीका अवसरमा आयोजित ‘बाबुराम आचार्य र योगदान’ विषयक विचार गोष्ठीमा आचार्यका प्रकाशित अप्रकाशित सबै कृतिको खोज अनुसन्धान गरी जस्ताको तस्तै प्रकाशन गर्न र संरक्षण गर्नुपर्ने सुझाव दिएका छन् ।

कार्यक्रममा प्रज्ञा प्रतिष्ठानका कुलपति गंगाप्रसाद उप्रेतीले आचार्यको अध्ययनमा संलग्न संघसंस्थासँग मिलेर प्रतिष्ठानले उहाँका कृति संरक्षण, सम्वद्र्धनका लागि आवश्यक काम गरिरहेको जानकारी गराएका थिए । आचार्यको नाममा विशिष्ट पुरस्कार स्थापना गर्न सरकारसँग आग्रह गर्ने बताए ।

नेपालको इतिहास, भाषा, साहित्यलगायत क्षेत्रमा इतिहासशिरोमणि आचार्यको योगदानलाई संस्थागत गर्न सबैको सहयोगको अपेक्षा गर्दै आचार्यका अप्रकाशित कृति आगामी दिनमा प्रकाशन गर्दा मूलभावमा तोडमोड गर्न नहुने बताए ।

इतिहासशिरोमणि बाबुराम आचार्य स्मृति प्रतिष्ठानका अध्यक्ष प्राडा तुलसीराम बैद्यले आचार्यलाई राज्यले इतिहासशिरोमणि पदवी दिएर ठूलो सम्मान गरेको भन्दै आचार्यको विद्वताको कदर गर्न सबै कृति संरक्षण गरी नयाँ पुस्ता समक्ष ल्याउनुपर्ने बताए ।

कार्यक्रममा प्राडा त्रिरत्न मानन्धरले ‘बाबुराम आचार्य र उहाँको योगदान’ विषयक कार्यपत्र प्रस्तुत गर्दै इतिहासशिरोमणि आचार्यले नै सगरमाथाको नामाकरण पहिलो पटक प्रकाशनमा ल्याएको बारेमा जानकारी गराए । प्राडा मीना ओझाले कार्यपत्रमाथि टिप्पणी गर्दै इतिहास र साहित्यलगायत क्षेत्रमा आचार्यले गर्नुभएको योगदान आजको पुस्ताको लागि इतिहासको स्रोत बनेको उल्लेख गरे ।

Loading...