संस्कृतिवीद तथा साहित्यकार सत्यमोहन जोशीको सम्मानमा आज सार्वजनिक विदा

२०७६ वैशाख १७ मंगलवार
Newsdesk Shikharnews

ललितपुर महानगरपालिकाले शताब्दी पुरुष सत्यमोहन जोशीको सम्मानमा वैशाख ३० गते सार्वजनिक बिदा घोषणा गरेको छ। ललितपुर महानगरपालिकाका मेयर चिरिबाबु महर्जनले सार्वजनिक बिदा दिने जानकारी सोमबार दिए ।

जोशी ३० गते ९९ वर्ष पूरा गरी सय वर्ष लाग्दै छन् । राष्ट्रको कला, संस्कृति र साहित्य विकासमा महत्वपूर्ण योगदान गर्दै अन्तराष्ट्रिय स्तरमा चिनाएको भन्दै सय वर्ष पुगेकै दिन महानगरपालिका अन्तर्गतका सबै कार्यालयमा सार्वजनिक बिदा दिने निर्णय गरिएको हो ।

महानगरपालिकाले पाठयपुस्तकमा उनको जीवनी समावेश गर्ने, तस्बिर अंकित चाँदीका मुद्रा निष्काशन र हुलाक टिकट प्रकाशन गर्ने, नगरभित्रका पार्कमा उनको प्रतिमा राख्ने र उपयुक्त सडकको नामकरण उनको नाममा गरिनेलगायत २२ कार्यक्रम सार्वजनिक गरेको छ ।

वैशाख ३० सम्ममा सय वर्ष पुग्न लागेका सबै ज्येष्ठ नागरिकलाई सम्मान गर्ने महानगरको योजना छ । तर आफ्ना नगरमा के कति ज्येष्ठ नागरिक सय वर्ष पुग्न लागेका छन् जानकारी नभएको उनले बताए ।

सत्यमोहन जोशीको संक्षिप्त जीवनी
सत्यमोहन जोशी बाबु शंकरदास (शंकरराज) जोशी र आमा राजकुमारी (नोगलदेवी)का सुपुत्रका रूपमा वि.सं. १९७७ साल वैशाखमा बखुम्बहाल, ललितपुरमा जन्मेका हुन् । जोशीले नेपाली मौलिक लोकसंस्कृति र साहित्यको क्षेत्रमा अतुलनीय योगदान दिएका छन् । उनी ३ पटक मदन पुरस्कार प्राप्त गर्ने श्रष्टा हुन् । जोशीले हाम्रो लोकसंस्कृतिका लागि पहिलोपटक वि.सं. २०१३ सालमा, नेपाली राष्ट्रिय मुद्रा नामक ग्रन्थका लागि दोस्रोपटक वि.सं. २०१७ सालमा, र कर्णाली लोकसंस्कृति नामक ग्रन्थको लागि उनले संयुक्त रूपमा तेस्रोपटक वि.सं. २०२८ सालमा मदन पुरस्कार पाएका थिए ।

जोशीले त्रिचन्द्र कलेजबाट बिएसम्म अध्ययन गरेका छन् । जोशी वि.सं. २०१५ मा पुरातत्व र संस्कृति विभागका पहिलो निर्देशक थिए ।
नेपाली भाषा, कला, संस्कृतिको संरक्षण, संस्कृतिको संरक्षण, सम्बर्धन र विकासमा लागि परेका हुनाले उहाँको योगदानको कदर स्वरूप जोशीलाई सुप्रबल गोर्खा दक्षिणबाहु विख्यात त्रिशक्ति पट्ट, आदिकवि भानुभक्त पुरस्कार, काठमाडौं विश्व विद्यालयले विद्यावारिधीको मानार्थ प्रमाणपत्र प्रदान गरेको छ । नेपाल सरकारले पनि उज्ज्वल कीर्तिमान राष्ट्रदीपबाट सम्मानित गरेको छ । जोशी अनुसन्धानात्मक कृति नेपालीमा १०, नाटक पाँच, काव्य दुई र कथासङ्ग्रह पाँच तथा नेवारी भाषामा गरी करिब ५० कृति प्रकाशित भइसकेका छन् ।