यो हो संसारकै सबैभन्दा ठूलो बाइक

२०७६ वैशाख १९ बिहीवार
Newsdesk Shikharnews

विश्वकै सबैभन्दा ठूलो मोटरसाइकल कुन हो त ?
यसका लागि गिनिज वुक अफ वल्र्ड रेकर्डलाई आधार मान्नुपर्छ । यद्यपि ‘ठूलो वाइक’को रुपमा गिनिज वुकमा नाम लेखाएको वाइक व्यवहारिक प्रयोजनका निम्ति उपयोगी नहुन सक्छ ।

त्यसैले यहाँ त्यस्तो मोटरसाइकलको चर्चा गरिदैछ, जसलाई कम्पनीले व्यवसायिक रुपमा उत्पादन गर्दैछ । यो मोटरसाइकल जो कोहिले खरिद गरेर गुडाउन सक्नेछ ।

जर्मनको गाडी निर्माण गर्ने कम्पनी क्लेमेन्स एफ लियोनहार्र्टले यस किसिमको मोटरसाइकल उत्पादन गरेको हो । कम्पनीले आकर्षक, विशाल लुक्स र दमदार इन्जिनको साथ यो मोटरसाइकल प्रस्तुत गरेको छ ।

चल्तीको मोटरसाइकलको तुलनामा यो निकै हेभी छ । व्यवसायिक रुपमा उत्पादन गरिएको अहिलेसम्मकै ठूलो मोटरसाइकल हो यो । मोटरसाइकल कुदाउन भने त्यति सजिलो छैन, यसका लागि खास प्रंशिक्षण लिनुपर्ने वताइन्छ ।

आकार ठूलो हुनका साथै यस मोटरसाइकलको तौल पनि धेरै छ । लियोनहार्ट गनबस ४१० मोडलको यो मोटरसाइकल ६ सय ५० केजीको छ । जुन सामान्य मोटरसाइकलको तुलनामा ५ गुना वढी हो ।

यसमा ६,७२८ सीसी क्षमताको दमदार इन्जिन प्रयोग गरिएको छ भने यसमा थ्रि स्पिड ट्रान्समिसन प्रयोग गरिएको छ । त्यस्तै यसको अगाडिको टायर ३८ इन्चको र पछाडि ४२ इन्चको छ ।