रुट र बटलरले शतक बनाउँदा पनि पराजित भयो इंग्ल्याण्ड, पाकिस्तान जितको ट्रयाकमा

२०७६ जेठ २१ मंगलवार
Newsdesk Shikharnews

काठमाडौं । लगातार ११ एकदिवसीय खेल हारेको पाकिस्तानले सोमबार आईसीसी विश्व कप क्रिकेटमा आयोजक इंग्ल्याण्डलाई पराजित गर्दै जितको लयमा फर्केको छ ।

ट्रेन्टब्रिजमा पाकिस्तानले दिएको ३४९ रनको लक्ष्य पछ्याएको इंग्ल्याण्डले ९ विकेटमा ३३४ रनमात्र बनाउन सक्यो । पछिल्ला ११ एकदिवसीय म्याच हारेको पाकिस्तानले १२ औं खेलमा १४ रनको जित निकाल्यो ।

पाकिस्तानले टस हारेर पहिला ब्याटिंग गर्दै ८ विकेटमा ३४८ रन बनाएको थियो । विशाल लक्ष्य पछ्याएको इंग्ल्याण्डका लागि जोय रुट र जोस बटलरले शतक बनाए पनि टिमलाई जित दिलाउन सकेनन् । रुटले १०७ र बटलरले १०३ रन बनाए । तर, अन्य ब्याट्सम्यानले राम्रो स्कोर गर्न नसक्दा पाकिस्तानले जारी विश्व कपको दोस्रो खेलमा पहिलो जित हात पार्यो । उसले पहिलो खेल वेष्टइण्डिजसँग गुमाएको थियो ।

उता इंग्ल्याण्डले पनि दोस्रो खेलमा पहिलो हार ब्यहोर्यो । उसले पहिलो खेलमा दक्षिण अफ्रिकालाई पराजित गरेको थियो ।

पाकिस्तानको जितमा बलिंगलबार वाहब रियाजले ३ विकेट लिए भने मोहम्मद आमिर र शादव खानले २–२ विकेट लिए । यस्तै मोहम्म हाफिज र सोयब मलिकले १–१ विकेट लिए ।

यसअघि हाफिजले ८४ रन बनाएपछि पाकिस्तानले सुरक्षित ३४८ रनको विशाल स्कोर बनाएको थियो । अंक तालिकमा पाकिस्तानले पनि दुई अंक जोडेको छ ।