बिग बोसका कारण सलमान खानलाई हुनेछ सबैभन्दा ठूलो नोक्सान

२०७६ असोज १५ बुधवार
Newsdesk shikharnews

मुम्बइ। टिभीको सबैभन्दा विवादित शो बिग बोस सुरु भएको छ । २९ सेप्टेम्बरका दिन साँझ ९ बजे सलमान खानले शोको प्रिमियर गरे । शो सुरु हुनासाथ यसले टिभीका अन्य शोलाई टिआरपीमा टक्कर दिने अनुमान गरिएको छ । तर, यसका कारण सबैभन्दा ठूलो नोक्सानी सलमान खानलाई नै हुने भएको छ । यसको कारण हो बिगबोसको समय ।सलमानको शो बिगबोस हप्तामा ५ दिन सोमबारदेखि शुक्रबारसम्म राती साढे १० बजे आउनेछ ।

त्यसपछि शनिबार र आइतबार सलमानको विकेन्ड का वार आउनेछ । बिगबोसमा २ दिन मात्र यस्ता हुनेछन जुन दिन सलमान घरमा आएर त्यहाँका सदस्यको हिसाबकिताब बुझ्छन् । पुरानो बिग बोसको इतिहास हेर्दा विकेन्डका वारले सबैभन्दा धेरै टिआरपी पाउँछ । सलमानले टिआरपी पाएर पनि सलमानलाई घाटा हुने कारण हो सलमानको अर्को शो द कपिल शर्मा शो ।

सलमानले टिभीमा द कपिल शर्मा शोमार्फत कदम राखेका हुन् । यो शोका निर्माता सलमान हुन् । शोमा सलमानको ठूलो बजेट लगानी भएको छ । द कपिल शर्मा शो को समय शनिबार र आइतबार राती ९ बजे छ । यो शो टिआरपी चार्टमा सुपरहिट छ । तर अब यो शोको टक्कर बिगबोससँग हुने भएको छ । यस्तोमा टिआरपी बिगबोसले पाए पनि कपिल शर्मा शोले पाए पनि नोक्सानी सलमानलाई नै हुनेछ । बिगबोसको टिआरपी कम भए सलमानको स्टारडमलाई धक्का लाग्नेछ भने कपिल शर्मा शोको टिआरपी घटे सलमानको लगानी घाटामा जानेछ ।