काठमाडौं। मोडलिङसम्बन्धी काम गर्ने भन्दै विराटनगर पुर्‍याएर २२ वर्षीया युवतीलाई ’तान्त्रिक पूजा’ गराउने तयारी गर्ने एक महिलासहित सात जनालाई पक्राउ गरेको प्रहरीले बताएको छ।

प्रारम्भिक अनुसन्धानमा मोटो रकम लिएर उनीहरूले ती युवतीलाई भारत पठाउन लागेको देखिएको प्रहरीले जनाएको छ।

महानगरीय प्रहरी परिसरका प्रवक्ता डीएसपी होबिन्द्र बोगटीका अनुसार पक्राउ उनीहरूलाई मानव बेचबिखन अन्तर्गत सात दिनको म्याद थप गरेर अनुसन्धान भइरहेको छ।

बोगटीले भनेस् “युवती खोज्दा राखिएका सर्तहरू र पक्राउ परेकासँग भेटिएका पूजा सामग्रीहरू हेर्दा मोडलिङका नाममा युवतीलाई तान्त्रिक काममा दुरूपयोग गर्ने गरी भारत लैजान लागेको देखिन्छ।“

मोडलिङमा काम दिने भन्दै पक्राउ परेकाहरूले युवतीको खोजी गरेका थिए।

तर उनीहरूले विभिन्न खालका सर्तहरू राख्न थाले पछि परिवारका सदस्यहरू प्रहरीको सम्पर्कमा आएको र प्रहरीले उनीहरूको पिछा गरेको बताइएको छ।

उनीहरूले मोडलिङका भन्दा पनि अनौठो खाले सर्तहरू राखेका कारण परिवार र प्रहरी सतर्क भएको थियो।

राखिएका केही सर्तहरू यस्ता थिए :

उचाइ ठीक छ फिट हुनुपर्ने,
कार्यक्रमको समयमा महिनावारी भएको ११ दिनभन्दा बढी हुनुपर्ने,
शरीरमा चोटपटक लागेको हुन नहुने र
कुनै पनि शल्यक्रिया गरेको हुन नहुने।
ती युवतीमा यी सबै कुरा मिलेपछि उनको भिडिओ खिचेर विराटनगर पठाइएको र ठिक छ भन्ने जवाफ आएपछि एक महिलाले हवाईजहाजबाट युवतीलाई विराटनगर पुर्‍याएको प्रहरीले बताएको छ।

मोडलिङको रुचि भएकी युवतीलाई सुरुमा काठमान्डूमै काम गर्नुपर्ने भनिए पनि दोस्रो स्थानका रूपमा कोटेश्वर र तेस्रो स्थानको रूपमा विराटनगर तोकिएको जानकारी दिइएको प्रहरी अनुसन्धानमा खुलेको छ।

पक्राउ परेकामध्ये एकजना हातहतियार खरखजना र शरीर बन्धक मुद्दामा सप्तरीबाट धरौटीमा छुटेका व्यक्ति भएको बताइएको छ।

विराटनगर जाने कुरामा युवतीले आनाकानी गरेपछि ५० हजार पारिश्रमिक दिने भन्दै २६ हजार पेस्की दिएको र आउनेजाने टिकट व्यवस्था गरेको युवतीले प्रहरीलाई बताएकी छन्।

विराटनगरमा उनलाई धर्मशालामा राखेको र लुगा किन्ने बहानामा सीमाको जोगबनी लगेर उचाइ नाप्ने र शरीरको घाउचोट हेर्ने काम भएको प्रहरीको भनाइ छ।

भारत पुर्‍याउने व्यवस्थापनका लागि विभिन्न समूहमा मानिस परिचालन भएको प्रहरीले बताएको छ।

अन्तिम योजनाका बारेमा पक्राउ परेकाहरू जानकार नभएकाले त्यसबारेमा प्रष्ट हुन नसकेको प्रहरीको भनाइ छ।

तर पक्राउ गरिएकासँग कालो धागो र रातो कपडाको बुटीजस्ता तान्त्रिक पूजा गर्ने खालका सामग्रीहरू भेटिएकोले प्रहरीले हत्या योजना भएकै आशङ्कामा अनुसन्धान अगाडि बढाएको बताएको छ।