अवकाश हुँदै तीन सचिव, कस्को के दाउ

२०७६ माघ ६ सोमवार
Newsdesk Shikharnews

काठमाडौं, ६ माघ । सरकारका तीन सचिवले यसै महिना अवकाश पाउँदैछन् । २२ माघ २०७१ मा सचिवमा बढुवा भएका राजन खनाल, प्रेमकुमार राई र गजेन्द्र ठाकुरले अवकाश पाउन लागेका हुन् । अवकाश पाएपछि पनि संवैधानिक आयोगमा नियुक्ति वा अन्य जिम्मेवारी लिन तीनैजना सचिव सक्रिय भइसकेका छन् ।

२२ माघबाट अनिवार्य अवकाश पाउनेमध्येका राजन खनाल अर्थमन्त्रालयमा छन् । उनी अख्तियारको आयुक्तका दाबेदार हुन् । प्रेमकुमार राई गृहसचिव हुन् । उनी पनि अख्तियारको आयुक्तमा दाबी गर्दै आएका छन् ।नेपाल ट्रष्टका सचिव गजेन्द्र ठाकुर पछिल्लो समय निकै चर्चामा छन् । ट्रष्टको जग्गा लिजमा लिंदा भएका अनियमितता उनको पालामा बाहिर आयो । ट्रष्टको हराएको र हडपिएको जग्गा खोजीमा पनि उनले महत्वपूर्ण भूमिका निभाए । ठाकुर पनि संवैधानिक निकायमा नियुक्तिको आशामा छन् ।

खनाल र राईलाई वर्तमान सत्तारुढ दलले पनि रुचाएको छ । ठाकुरको भने खानेपानीमन्त्री विना मगरसँग विवाद भएको थियो ।अख्तियारमा प्रमुख आयुक्तमा प्रेमकुमार राईको निकै चर्चा छ । तर, उनलाई नेकपाको एउटा पक्षले रोक्न खोजिरहेको छ । अख्तियारमा दुई आयुक्त खाली छ । प्रमुख आयुक्त नविन घिमिरे पनि ६५ वर्ष उमेर हदका कारण अबको सात महिनापछि घर जाँदैछन् । यसकारण आयुक्तको दौडधूप तिव्र भएको हो ।