काठमाडाैं। सरकार बाहिर रहेर पनि सत्तारुढ नेपाल कम्युनिस्ट पार्टी (नेकपा)लाई सघाउँदै आएको राष्ट्रिय जनता पार्टी (राजपा) पनि उपसभामुखको आकांक्षी देखिएको छ ।  प्रमुख प्रतिपक्षि नेपाली काँग्रेस, समाजवादी पार्टी, राष्ट्रिय प्रजातन्त्र पार्टी (राप्रपा) लगायतका दल भने मौन देखिएका छन् ।  गत पुस २ गते सत्तारुढ दल नेकपा र राजपाबीच राष्ट्रिय सभा चुनावका लागि सहकार्य गर्ने सहमति भएसँगै उपसभामुखमा नेकपाले राजपालाई सघाउने सङ्केत देखिएको छ ।
 

सभामुखको उम्मेदवारी दर्ताका क्रममा सापकोटाको समर्थकमा राजपा नेता लक्ष्मणलाल कर्ण बस्नुले उपसभामुख राजपालाई दिने नेकपा र राजपाबीच भित्री सहमति भएको देखिन्छ ।  सभामुखको उम्मेदवार बनेका अग्नी सापकोटाको प्रस्तावकमा सुवासचन्द्र नेम्वाङ र समर्थकमा कर्णसहित देव गुरुङ र ओनसरी घर्तीमगर बनेका थिए । फरक दलबाट राजपा नेपाल सभामुखको समर्थक बनेपछि उपसभामुख उसैले लिने पक्का देखिएको हो ।
 

तर राजपा नेपालका महासचिव केशव झाले उपसभामुखका लागि नेकपासँग छलफल नभइसकेको बताए ।  दुवै दलबीच राजनीतिक विषयमा सहमतिका साथ अघि बढ्ने सहमति भएकाले उपसभामुखको विषयमा फरक दलकै हुनु पर्ने भएकाले राजपाले पाउने सम्भावना भने यथावत् रहने उनले बताए ।   सभामुखका उम्मेदवारलाई राजपाका नेताले समर्थन गर्नुले दुवै दलबीच आगामी दिनमा सहकार्य गरेर अगाडि बढ्न सकिने सन्देश दिएको महासचिव झाको भनाइ छ ।

 
सभामुख र उप–सभामुखमा फरक–फरक लिंग र फरक–फरक दल हुनुपर्ने संवैधानीक प्रावधान रहेकाले नेकपाबाट अग्नी सभामुख हुने पक्का भएपछि उप सभामुख फरक दल र महीला नै हुनुपर्ने अवस्था पनि सृजना भएको छ ।   अब १२ गतेको संसद् बैठकबाट सभामुख निर्वाचित भएपछि मात्रै उपसभामुखको गृहकार्य अघि बढ्ने बताइएको छ ।

 उपसभामुखमा राजपाको दाबेदारी रहने चर्चासँगै पार्टीभित्र कसलाई उपसभामुखको उम्मेदवार बनाउने भन्ने चर्चा पनि चल्न थालेको छ । सभामुख नेकपाबाट पुरुष हुने पक्का भएपछि फरक दल र फरक लिङ्गको आधारमा उपसभामुख अब महिला हुनु पर्नेछ । राजपाभित्र उपसभामुखको उम्मेदवारको रुपमा चन्दा चौधरी र अमृता अग्रहरीको नाम चर्चामा छ ।

उपसभामुख राजपाले पाउने निश्चित भए अग्रहरी भन्दा चौधरी नै उपसभामुखमा पार्टीबाट सिफारिस हुने सम्भावना रहेको राजपाका एक नेताले बताए । चौधरी पार्टी नेता महन्थ ठाकुर निकट रहेकाले सम्भावना उनैको देखिएको ती नेताको दाबी छ । तर अध्यक्ष मण्डलले निर्णय गरेर पठाउने भएकाले निर्णयपछि मात्रै त्यसबारे जानकारी हुनेछ ।

 
काङ्ग्रेस पनि उपसभामुखको दौडमा

प्रमुख प्रतिपाि दल नेपाली काङ्ग्रेस पनि उससभामुख पदको दौडबाट अछुत भने छैन ।  सभामुखमा उम्मेदवारी नदिएको काङ्ग्रेसले उपसभामुखमा उम्मेदवारी दिने तयारी गरेको छ । उपसभामुख आफूले पाउने रणनीतिअनुरुप नेकपासँग काङ्ग्रेसले छलफल सुरु गरेको छ ।

मङ्गलबार मात्रै नेकपाका कार्यवाहक अध्यक्ष पुष्पकमल दाहाल प्रचण्डसँग नेपाली काङ्ग्रेसका वरिष्ठ नेता रामचन्द्र पौडेलले भेट गरेका थिए । भेटमा उपसभामुखमा काङ्ग्रेसलाई प्रस्ताव गर्न पौडेलले अध्यक्ष प्रचण्डसँग आग्रह गरेको बुझिएको छ ।

नेकपाले राजनीतिक संस्कार देखाउन भएपनि मुख्य विपक्षि दलललाइ उपसभामुख दिनुपर्ने काँग्रेसका नेता पौडेलले बताएका थिए । जवाफमा अध्यक्ष प्रचण्डले यसबारेमा पार्टीभित्र छलफल गरेर मात्रै अघि बढ्न सकिने जवाफ दिए ।  काङ्ग्रेस संसदीय दलका प्रमुख सचेतक बालकृष्ण खाँणले उपसभामुखका लागि काङ्ग्रेसले उम्मेदवारी दिने बताएका छन् ।

माघ १२ गतेको संसद् बैठकले सभामुखको औपचारिक घोषणा गर्ने र सभामुखले सपथ लिएपछि बस्ने संसद् बैठकले उपसभामुखको निर्वाचन प्रक्रिया अघि बढाउनेछ ।