बैठकको सुरुमा प्रधानमन्त्री एवं नेकपा अध्यक्ष ओलीले सम्बोधन गर्ने र त्यसपछि अध्यक्षद्वयका तर्फबाट अध्यक्ष दाहालले राजनीतिक प्रतिवेदन प्रस्तुत गर्नेछन्। बुधबार नै सातै प्रदेशका अध्यक्षले आफ्नो प्रतिवेदन प्रस्तुत गर्ने र बिहीबारदेखि समूहगत रूपमा छलफल हुनेछ
बैठकमा पार्टी महासचिव विष्णु पौडेलले विधान संशोधन प्रस्ताव प्रस्तुत गर्नेछन् । बैठकमा सचिवालय सदस्य वामदेव गौतमलाई उपाध्यक्ष बनाउने गरी विधान संशोधनका साथै पार्टीको अगामी कार्ययोजनासहितका विभिन्न विषयमा गम्भीर रूपमा छलफल हुने बताइएको छ ।

 

छलफलका एजेन्डा
–अध्यक्षद्वयको राजनीतिक प्रतिवेदन
–महासचिव विष्णु पौडेलको विधान संशोधन
–पार्टीको अगामी ६ महिने अभियान
–सातै प्रदेशका अध्यक्षको प्रतिवेदनबारे

बैठकको सुरुमा अध्यक्षद्वय ओली र दाहालले राजनीतिक प्रतिवेदन प्रस्तुत गर्दै समूह विभाजन गरी छलफल सुरु गरिने योजना छ । ४ सय ५० सदस्यीय केन्द्रीय कमिटीलाई तीन समूहमा विभाजन गरी छलफल गरिने तयारी भइरहेको जनाइएको छ । तीनमध्ये एक समूह पार्टी केन्द्रीय कार्यालय धुम्बाराही, दोस्रो समूह राष्ट्रिय सभागृह र तेस्रो समूहलाई पार्टी केन्द्रीय कार्यालय पेरिसडाँडामा छलफलका लागि तोकेर समूहगत छलफल अगाडि बढाउने तयारी छ ।

तत्कालीन एमाले र माओवादी केन्द्रका बीचमा ३ जेठ २०७५ मा पार्टी एकता भएको थियो । त्यसपछि निर्वाचन आयोगमा नागरिकताको प्रतिलिपि र हस्ताक्षर बुझाउन केन्द्रीय सदस्यलाई बालुवाटार बोलाइएको थियो । पार्टी एकता पछिको यो पहिलो बैठक हो। पार्टीको अन्तरिम विधानमा केन्द्रीय कमिटी बैठक प्रत्येक ६ महिनामा बस्नुपर्ने उल्लेख गरिएको छ।