चिनियाँ र भारतीय सेनाबीच झडप हुँदा २० भारतीय सैनिकको मृत्यु

२०७७ असार ३ बुधवार
Newsdesk Shikharnews

भारतीय र चिनियाँ सेनाबीच भएको झडपमा २० जना भारतीय सेनाको मृत्यु भएको छ । पछिल्लो समय लद्दाखमा दुई देशबीच विवाद बढेको छ । सोही क्षेत्रमा भएको झडपमा परि कमान्डिङ अफिसर समेत गरि २० जना भारतीय सेनाले ज्यान गुमाएका हुन् ।

उक्त झडप गएराति भएको हो । गम्भीर घाइते भएका १७ जना भारतीय सैनिकहरूको शून्य डिग्री सेल्सीअसभन्दा तलको तापक्रम र उच्च हिमाली क्षेत्रमा तिनीहरूलाई लागेको चोटका कारण मृत्यु भएको बताइएको छ।

लद्दाखको १४ हजार फिट उचाइँमा रहेको गालवन भ्यालीमा यो झडप भएको हो ।

चीन तर्फ पनि केहि सैनिक मारिएको भारतीय सञ्चारमाध्यमले जनाएका छन् । यो क्षेत्रमा पछिल्लो ४१ दिनदेखि तनाव रहेको छ ।

गलवान उपत्याकाको यस क्षेत्रमा दुबै देशका सेनाले आफ्नो भूमि भन्दै ओगट्ने गरेका थिए ।

दुई साताअघि दुई देशका सेनाबीच यस क्षेत्रलाई शान्त राख्ने विषयमा वार्ता सम्पन्न भएको थियो । वार्ता सफल भएको बताइएको दुई सातामै सेनाबीच झडप भएको हो । २०१७ मा पनि चीन र भारतका सेनाबीच दोक्लममा हिंश्रक भीडन्त भएको थियो ।