को बन्ला नेपाल आइडल ३ को विजेता ?

२०७७ भदौ ११ बिहीवार
Newsdesk Shikharnews

नेपाल आइडल सिजन थ्रीको फाइनल शुक्रबार हुँदैछ । कोरोना संक्रमणका कारण लामो समय रोकिएर पून सुरु भएको नेपाल आइडलको अन्तिम प्रतिष्पर्धामा महोत्तरी बर्दिवासका किरण भुजेल, मोरङकी सज्जा चौलागाई र बर्दियाका प्रविण बेडवाल रहेका छन् । यी मध्ये किरण वाइल्ड कार्ड राउण्डबाट फेरि आइडलमा भित्रिएका हुन् । शुक्रवार यीनै तीनजनामध्येबाट एक जना सिजन थ्रिको नेपाल आइडल बन्नेछ । नेपालको तीन स्थानबाट प्रतिनिधित्व गर्ने तीन जना नै एक अर्काको कडा प्रतिष्पर्धी रहेका छन् । यी मध्ये जो नेपाल आइडल बने पनि उनीहरुको प्रस्तुति र क्षमताका कारण यसपटक अघिल्ला श्रृंखला जस्ता विवादित नहुने देखिएको छ ।

तीन प्रतिभामध्ये प्रविणलाई आइडलको दावेदार मानिएको छ । सुगम शैलीका गीत गाउँदै आएका उनले हरेक प्रस्तुतिमा दर्शक तथा निर्णायकको मन जित्दै आइरहेका छन् । प्रविण नेपाल आइडलबाट उदाएका नेपाली संगीतका प्रतिभाशाली गायक बन्ने निश्चित छ । गम्भिर र परिपक्व स्वर, अनी उनले गाउने गीतको शैली र विधाले उनी नेपाली संगीतको लामा रेसको घोडा हुन् । दर्शकको भोटको आधारमा विजेता छानिने आइडलमा सर्वाधिक भोट पाउने सम्भावना प्रविणको अधिक रहेको छ । खासगरी पश्चिम नेपालले आफुलाई धेरै कुरामा पछि परेको महशुष गर्छ । यही परिप्रेक्ष्यमा देशका हरेक क्षेत्रमा आफुलाई समानरुपमा प्रस्तुत गर्नु पर्छ भन्ने पश्चिमेलीको मनोविज्ञानले पनि उनलाई धेरै धेरै भन्दा भोट आउने सम्भावना रहेको छ ।

यसपटक नेपाल आयडलले महिला विजेता पाउने सम्भावना पनि उत्तिकै छ । यो सम्भावनाको दावेदार हुन् सज्जा चौलागाई । मोरङबाट आइडलमा प्रतिनिधित्व गरिरहेकी सज्जाले सुरुवात देखि नै आकर्षक प्रस्तुुतिबाट आफुलाई आइडलको प्रवल दावेदार बनाउदै आएकी छन् । नेपाली गीत संगीतमा थुप्रै प्रतिभाशाली संगीतकर्मी दिइसकेको पूर्वी नेपालको पछिल्लो उपहार हुन् सज्जा । लोक, पप, सुगम सबै शैलीका गीतबाट उनले आफ्नो प्रतिभा देखाइ सकेकी छन् । निर्णायकको पनि उत्तिकै मन जित्दै आएकी उनलाई पुर्वेली दर्शकको दरिलो साथ हुने निश्चित छ । स्थान विशेषकाका दर्शकले आइडलका विजेतालाई गर्वको रुपमा लिने भएकाले पनि पूर्वी दशर्कले उनलाई भरपुर भोट हाल्ने सम्भाना छ र यही सम्भावना नै उनलाई आइडलको विजेता बनाउने कडी पनि बन्न सक्छ ।

वाइल्ड कार्डबाट प्रतिष्पर्धामा पून प्रवेश पाएका किरण कुमार भूजेल पनि आइडलको विजेताको उत्तिकै सम्भावना भएका दावेदार हुन् । किरणको मेलोडीयस स्वर उनको सबभन्दा ठूलो हतियार हो । लोक, पप, सबै विधाका गीत समानरुपमले गाउने किरण नेपाली चलचित्रका लागी सम्भावनायुक्त गायकको रुपमा उदाएका छन् । निर्णायकहरुले पनि उनलाई नेपाली चलचित्रको सम्भावनायुक्त गायक भनेर पटक पटक तारिफ गर्दै आएका छन् ।

यी र यस्तै प्रतिभा र विशेषताका कारण सिजन ३ को नेपाल आइडलमा प्रविण, सज्जा र किरणमध्ये एक जना आइडल बन्नेछन् । र, नेपालले पाउनेछ नयाँ नेपाल आइडल ।