प्रचण्ड-नेपाल पक्षद्वारा आक्रामक तयारी

२०७७ मंसिर १० बुधवार
Newsdesk Shikharnews

काठमाडौं, १० मंसिर । कुनै अप्रत्याशित घटना नभए सत्तारुढ नेपाल कम्युनिस्ट पार्टीको सचिवालय बैठक १३ मंसिरमा बस्नेछ । दश दिनका लागि स्थगित भएको बैठकमा अध्यक्षद्वय केपी शर्मा ओली र पुष्पकमल दाहाल प्रचण्डको दस्तावेजमाथि छलफल हुने वा संयुक्त दस्तावेज बन्ने निश्चित छैन । तर, ओलीले एउटै प्रस्ताव हुनुपर्ने बताइरहँदा प्रचण्डले दस्तावेज फिर्ता लिन मानेका छैनन् ।

दश दिनभित्र सहमतिको प्रयास भएपनि बन्न सकेको छैन । अब तीन दिन समय बाँकी छ । यसबीच पनि सहमति बनेन भने सचिवालय बैठक सार्ने या दुवै दस्तावेजमाथि छलफल गरी टुंगोमा पुग्ने बाहेक विकल्प छैन । फरक दस्तावेजमाथि छलफल भई टुंगोमा पुग्दा जसको दस्तावेजमा बहुमत हुन्छ त्यसकै जीत हुन्छ । आरोप प्रत्यारोपको दुई दस्तावेजमा ओलीको दस्तावेजमा बहुमत जुटेमा प्रचण्डको हार हुन्छ । यस्तो बेला उनले अध्यक्षबाट राजीनामा दिनुपर्ने नैतिक दबाब पर्न सक्छ । ओलीको दस्तावेज अल्पमतमा परेर हार भएमा उनले प्रधानमन्त्रीबाट राजीनामा दिनुपर्ने दबाब पर्न सक्छ । त्यसैले अवस्था निकै जटिल बन्दै गएको छ ।

सहमति बनाउन ओलीले विश्वासपात्र परराष्ट्रमन्त्री प्रदीप ज्ञवालीलाई प्रचण्डनिवास खुमलटार पठाएको पठायै छन् । ज्ञवालीले मङ्गलबार विहानै प्रचण्डसँग भेटेर सहमतिको बिन्दुबारे कुराकानी गरे । तर, कुनै निष्कर्ष निस्किएन ।

नेकपाभित्र अबको सचिवालय बैठकका लागि ओली, प्रचण्ड, माधव नेपालको आ आफ्नो तयारी छ । ओलीले विश्वासपात्रहरुसँग भेटेर विकल्पसहित छलफल गरिसकेका छन् । उनले शनिबार काँग्रेस सभापति शेरबहादुर देउवालाई बालुवाटारमा भेटेर तरंग ल्याइदिइसकेका छन् । देउवासँग सत्ता समिकरणका लागि छलफल गरेको विषयले प्रचण्ड र नेपाललाई झस्काएको छ ।

प्रचण्ड र माधव नेपालले आन्तरिक तयारीका लागि भेटघाट तिव्र पारेका छन् । उनले नेकपा वरिष्ठ नेता झलनाथ खनाल र उपाध्यक्ष बामदेव गौतमसँग संयुक्त भेटघाट गरे । भेटमा भावी रणनीतिबारे कुराकानी भएको बुझिएको छ । खनाल र गौतमले अब कसरी बढ्ने भन्नेबारे गम्भीर छलफल गरेका थिए ।

हिजो साँझ वरिष्ठ नेता माधवकुमार नेपालसँग प्रचण्डले साँझ छलफल गरे । उक्त भेटमा प्रवक्ता नारायणकाजी श्रेष्ठ पनि सहभागी थिए । नेपालले टसमस नभई अगाडि बढ्नेबारे कुराकानी गरेको बुझिएको छ । उनले पार्टी एकतालाई केन्द्रबिन्दुमा राखेर जानुपर्ने लाइन स्पष्ट पारेका थिए ।