काठमाडौँ । सभामुखको निर्वाचनअघि प्रधानमन्त्री पुष्पकमल दाहाल ‘प्रचण्ड’ र काँग्रेस नेता रामचन्द्र पौडेलबीच बालुवाटारमा भेटवार्ता भएको छ ।

नेपाली काँग्रेसका वरिष्ठ नेता पौडेल प्रचण्डलाई भेट्न आज बिहान बालुवाटार पुग्नुभएको हो।

प्रधानमन्त्री प्रचण्ड र पौडेलबीच समसामयिक राजनीतिक घटनाक्रमबारे कुराकानी भएको पौडेलको सचिवालय स्रोतले दिएको जानकारी दिएको छ ।

प्रतिनिधिसभामा सभामुख चयनका लागि बैठक बस्नुभन्दा अघि प्रधानमन्त्री प्रचण्ड र काँग्रेस नेता पौडेलबीच भेटवार्ता भएको हो।

सभामुख निर्वाचनमा प्रधानमन्त्री प्रचण्डले सहयोग गर्ने काँग्रेसको अपेक्षा थियो । तर माओवादीको समर्थनमा एमालेले देवराज घिमिरेलाई सभामुखको उम्मेदवार उठाएपछि काँग्रेसले ईश्वरी न्यौपानेलाई उम्मेदवार बनाएको छ ।

आज काँग्रेसको पदाधिकारी बैठक चलिरहेका बेला प्रचण्डले काँग्रेस सभापति शेरबहादुर देउवालाई सभामुखको उम्मेदवारी दिँदा छलफल गर्ने बताउनुभएको थियो । तर प्रचण्डले फोन नगरेपछि काँग्रेसले आफ्नै उम्मेदवार उठाएको हो ।

बिहीबार बिहान ११ः०० बजे प्रतिनिधिसभा बैठक बस्दै छ।

बैठकले सभामुखका दुई उम्मेदवार घिमिरे र न्यौपानेमध्ये एकलाई सभामुख निर्वाचित गर्दैछ । गत २६ पुसमा काँग्रेसले प्रधानमन्त्री प्रचण्डलाई विश्वासको मत दिएको थियो। काँग्रेसले राष्ट्रपति पद आफूले लिनका लागि कुराकानी गर्दै आएको छ।